नेपाली कांग्रेसका सभापति एवं पूर्वप्रधानमन्त्री शेरबहादुर देउवाले मुलुकमा शान्ति स्थापना गर्ने र संविधान निर्माणमा माधव नेपालको महत्त्वपूर्ण योगदान रहेको बताएका छन् । 

नेकपा एकीकृत समाजवादीको १० औं महाधिवेशनको उद्‌घाटन सत्रमा आइतबार शुभकामना मन्तव्य राख्दै देउवाले नेपालको राजनीतिमा माधव नेपालले महत्त्वपूर्ण भूमिका खेलेको बताएका हुन् । 

‘मुलुकमा शान्ति स्थापना गर्नै सवाल होस् या संविधान निर्माणमा माधवजीले महत्वपूर्ण भूमिका निर्वाह गर्दै आएका छन् । त्यसकारण माधवजीले नेपालको राजनीतिमा महत्त्वपूर्ण योगदान बनाएका छन्,’ देउवाले भने । 

मन्तव्य राख्न माइक अगाडि पुगेका देउवाले ‘सबैले छोटो बोल्छ भनेर लामै लेखेर ल्याएको थिएँ’ भन्दै मन्तव्य शुरू गरेका थिए ।

कोटको भित्री खल्तीबाट लिखित भाषण निकालेका देउवाले लामो बोलेनन् ।

माधव नेपालको प्रशंसा गरेका देउवा अध्यक्ष नेपालको भाषण नसुनी छोटो मन्तव्य राखेर हिँडे ।