केन्द्रमा सत्ता समीकरण फेरिने पक्का भएसँगै प्रदेश सरकारमा समेत हलचल शुरू भएको छ । समीकरण फेरबदलसँगै प्रदेश सरकारसमेत हेरफेर हुने त निश्चित नै छ ।

नयाँ समीकरण बन्ने भएपछि केहीलाई भने आफ्नो मन्त्री पद गुम्ने डर रहेको छ । 

कांग्रेस सरकारमा आउँदा मन्त्री पद जाने खतरा बढेको कोशी प्रदेशको आन्तरिक मामिला तथा कानून मन्त्री लीलावल्लभ अधिकारीले बताए । नयाँ समीकरण बन्दा आफ्नो मन्त्रालय नै कांग्रेसको भागमा पर्न सक्ने उनको भनाइ छ । उनी गत जेठ ४ गते मन्त्री नियुक्त भएका थिए । कोशीमा माओवादीले तीन मन्त्रालय पाएको थियो । 

कोशीमा भौतिक पूर्वाधार विकासमा गणेशप्रसाद उप्रेती, पर्यटन, वन आर्थिक मामिला तथा योजना मन्त्रालयमा रामबहादुर मगर, खानेपानी, सिँचाइ तथा ऊर्जा मन्त्रालयमा एकराज कार्की, सामाजिक विकास मन्त्रालयमा पाँच कर्ण राई मन्त्री छन् । उनीहरू सबै जना एमालेका हुन् । 

उद्योग, कृषि तथा सहकारी मन्त्रालय भने मुख्यमन्त्री आफैंले राखेका छन् । नयाँ समीकरणअनुसार भागबन्डा हुँदा एमालेलाई पहिलाभन्दा घाटा हुने एमाले कै मन्त्रीहरू बताउँछन् ।

सोमबार राति कांग्रेस र एमालेले सत्ता सहकार्य गर्ने सहमति गरेका थिए।