उदयपुरको त्रियुगा नगरपालिका–१५ स्थित रानिवासमा वर्षाको कारण पहिरो गई पुरिएका दुईमध्ये एक जनाको मृत्यु भएको छ ।
आज विहान अन्दाजी ९ः५० बजे सोही ठाउँमा रहेको चार वटा घर पहिरोले पुरिदा घाईते भएका ४० वर्षिया हिरामाया मगर र ८ वर्षिया रुपकला मगरलाई उद्धार गरी उपचारको लागि स्वास्थ्य चौकी खाबुँमा ल्याईएको थियो । घाईतेमध्ये ८ वर्षिया रुपकला मगरको भने उपचारको क्रममा मृत्यु भएको छ ।  
उक्त स्थानमा सशस्त्र प्रहरी बल नेपाल नं. ५ गण उदयपुर र नेपाल प्रहरीको संयुक्त टोली उनीहरुको उद्धार कार्यमा जुटेको थियो । साथै सो स्थानमा जोखिमयुक्त रहेका १० घरपरिवारलाई सुरक्षित स्थानमा सारिएको छ ।
त्यसैगरी सोही जिल्लाको त्रियुगा नगरपालिका–१० घाईघाटस्थित साउनेमा अविरल वर्षाको कारण पहिरो गई अवरुद्ध सडक सुचारु गरिएको सशस्त्र प्रहरीले विज्ञप्तिमार्फत जानकारी दिएको छ ।