०८ साउन २०८३, शुक्रबार
नारायणगढ–मुग्लिन सडकको सिमलतालमा लेदोसहितको पहिरोले त्रिशूली नदीमा बेपत्ता भएका दुईवटा बसमा कम्तीमा ६५ जना यात्रु रहेको पाइएको छ ।
ती बसमा चालकसहित ६५ जना रहेको चितवनका प्रमुख जिल्ला अधिकारी इन्द्रदेव यादवले जानकारी दिए ।
काठमाडौंबाट रौतहटको गौर जाँदै गरेको गणपति डिलक्स र वीरगञ्जबाट काठमाडौं आउँदै गरेको एञ्जल लेखिएको बस पहिरोले बगाउँदा त्रिशूलीमा खसेका हुन् ।
प्रजिअ यादवका अनुसार गौर जाँदै गरेको बसमा ४१ र काठमाडौं आउँदै गरेको बसमा २४ जना रहेका थिए ।
त्रिशूली नदीमा बेपत्ता भएका दुईवटा यात्रुबाहक बसको खोजी र उद्धारका लागि सशस्त्र प्रहरी बलको टोली घटनास्थल पुगिसकेको छ ।
सशस्त्रको गाेताखोर टोली नदीभित्र छिरेर बसको खोजी गरिरहेको सशस्त्रका सहप्रवक्ता डीएसपी शैलेन्द्र थापाले जानकारी दिए ।
उद्धार टोली डुबेको बसको अवस्था शुक्रवार बिहान करिब ८ बजेसम्म फेला पार्न नसकेको उनले बताए ।
