भारतका प्रधानमन्त्री नरेन्द्र मोदीले नेपालका नवनिर्वाचित प्रधानमन्त्री केपी शर्मा ओलीलाई शपथअगावै बधाई दिएका छन् । 

सामाजिक सञ्जाल एक्स (ट्वीटर)मा सोमवार बिहान ओलीलाई बधाई दिँदै उनले सँगै काम गरेर नेपाल–भारत सम्बन्धलाई थप उचाइमा पुर्याउने आफ्नो अपेक्षा रहेको बताएका हुन् । 

’नेपालको प्रधानमन्त्रीमा नियुक्त भएकोमा केपी शर्मा ओलीजीलाई बधाई छ,’ उनले लेखेका छन्, ’हाम्रा दुई देशबीचको गहिरो मित्रताको सम्बन्धलाई अझ बलियो बनाउन र हाम्रा जनताको प्रगति र समृद्धिका लागि परस्पर लाभदायक सहकार्यलाई विस्तार गर्न निकट सहयोग गर्ने अपेक्षा राख्दछु ।’

महाराजगन्जस्थित राष्ट्रपति निवासमा सोमवार अपरान्ह प्रधानमन्त्री ओलीलगायत नवनियुक्त मन्त्रीहरूको शपथ ग्रहण कार्यक्रम जारी छ । 

नेपाली कांग्रेससँगको सहमतिमा एमालेका अध्यक्ष ओली प्रधानमन्त्री बनेका हुन् ।