बाबुराम भट्टराई नेतृत्वको नेपाल समाजवादी पार्टीबाट फुटेको महिन्द्र राय यादव समूह समाजवादी मोर्चामा मिसिएको छ । 

मंगलबार बसेको बैठकले यादव नेतृत्वको नेपाल समाजवादी पार्टीलाई मोर्चामा सहभागी गराउने निर्णय गरेको नेकपाका नेता खड्गबहादुर विश्वकर्माले जानकारी दिए । 

उनले उपेन्द्र यादव नेतृत्वको जसपा नेपाल र मोहन विक्रम सिंहको मसाललगायतलाई पनि मोर्चामा आबद्ध गराउन पहल गर्ने निर्णय भएको जानकारी दिए । 

नेकपा एकीकृत समाजवादीको कार्यालयमा बसेको बैठकमा माओवादी केन्द्रका अध्यक्ष प्रचण्ड, एकीकृत समाजवादीका अध्यक्ष माधव नेपाल, नेकपाका महासचिव विप्लव लगायतको सहभागिता रहेको थियो । 

यस्तै बैठकले मोर्चाको आगामी कार्यक्रम तय गर्नका लागि चार सदस्यीय कार्यदल गठन गर्नेलगायतको निर्णय पनि गरेको छ ।