०८ साउन २०८३, शुक्रबार
स्पेनिस क्लब बार्सिलोना जर्मनीमा हालै सम्पन्न युरोकप फूटबल प्रतियोगितामा गोल्डेन बूट जितेका ड्यानी ओल्मोलाई भित्र्याउने प्रयासमा जुटेको छ ।
बार्सिलोनाले जर्मन क्लब आरबी लाइपजिगबाट स्पेनिस एट्याकिङ मिडफिल्डर तथा विङ्गर ओल्मोलाई भित्र्याउन चाहेको अन्तर्राष्ट्रिय सञ्चारमाध्यमले जनाएका छन् ।
२६ वर्षका ओल्मोले आइतवार राति सकिएको युरोकपमा ६ खेलबाट ३ गोल मात्र गरेनन् २ गोलमा एसिस्ट पनि प्रदान गरेका थिए । अन्य ५ खेलाडीले पनि ३–३ गोल गरेका थिए । तर २ एसिस्टले उनलाई गोल्डेन बूट दिलाएको थियो ।
ओल्मो २ खेलमा प्रतिस्थापन खेलाडीको रुपमा मैदानमा आएर गोल गर्न सफल भएका थिए ।
सन् २०२० मा क्रोएसियन क्लब डिनामो जाग्रेबबाट लाइपजिग भित्रिएका ओल्मोले १०७ जर्मन बुन्डेसलिगा खेलमा १७ गोल गरेका छन् ।
यसैगरी जर्मन क्लब बायर्न म्युनिख र इङ्लिस क्लब म्यानचेस्टर सिटी पनि ओल्मो अनुबन्ध गर्ने प्रयासमा रहेको बताइएको छ ।
