२९ जेठ २०८३, शुक्रबार
राष्ट्रिय स्वतन्त्र पार्टी (रास्वपा) की सांसद सोविता गौतमले आफूमाथि आइतबार निर्वाचन क्षेत्रमा दुर्व्यवहार भएको बताएकी छिन् ।
सोमबार प्रतिनिधि सभा बैठकको आकस्मिक समयमा गौतमले आफूमाथि विरोधी दलका युवाले फोहोर शब्द बोलेर गालीगलौज तथा दुर्व्यवहार गरेको बताएकी हुन् ।
‘कागेश्वरी मनोहरा नगरपालिकाको वडा नम्बर ६ मा पहिरो निरीक्षण गरी फर्केर आउँदा गाँजाको नशा र रक्सीले मातिएका युवाले मुख छाडेर गाली गरे । फोहोरी शब्द बोलेर घेर्ने काम भयो,’ गौतमले भनिन्, ‘चक्रब्युहजस्तो रचेर चर्को स्वरमा फोहोरी शब्दले गाली गर्ने र मलाई घेर्ने काम भयो ।’
आफू कुरा सुन्न तयार रहे पनि उनीहरू दुर्व्यवहार गर्ने शैलीमा प्रस्तुत भएको गौतमको भनाइ छ ।
‘सरकारलाई गम्भीरतापूर्वक ध्यानाकर्षण गराउन चाहन्छु– ममाथि अभद्र गर्ने व्यक्ति कुनै राष्ट्रिय दलको संगठनमा आबद्ध युवा साथी हुनुहुन्थ्यो । बाटो ढुकेर छोरीमान्छेलाई तर्साउने यो अमर्यादित भएन ? यो हर्कतको जिम्मा त्यो दलले लिने कि नलिने ?’ गौतमले संसद्मा प्रश्न गरिन् ।
