गीतकार पौडेलको ‘यसपालिको तीज रमाइलो’ गीत सार्वजनिक

हरितालिका तीज पर्वको अवसर पारेर विभिन्न स्रष्टाहरूको सृजना सार्वजनिक हुन थालेका छन् ।​

यसैबीच गीतकार निर्मलराज पौडेलको शब्द, चर्चित गायिका शान्तीश्री परियार र सङ्गीतकार मोहित मुनालद्वारा स्वरबद्ध ‘यसपालिको तीज रमाइलो’ नामक गीत बजारमा आएको छ ।

चेलीबेटी ज्यान माया माइतमै हाँसेर, तीज आयो ज्यान माया छमछमी नाचेर भन्ने मौलिक गीत परिवारका सबै जना एकै स्थानमा बसेर सुन्न र रमाउन सकिने गीतकार पौडेलले जानकारी दिए ।

कतिपय तीज गीत विवादमा तानिँदै आएका बेला यस्ता मौलिक गीतले पर्वको महत्त्व झल्काउने उनले बताए । तीज गीत आफ्नो मूल प्रवृत्तिबाट विमुख हुँदै गएको बेला मौलिक सृजनाका लागि आफूले अग्रसरता लिएको उनले जानकारी दिए ।

तीज गीतको परम्परा र मौलिकतालाई कायम राख्दै गरिएको सृजना श्रोता तथा दर्शकलाई मनपर्ने उनले विश्वास व्यक्त गरे ।

पछिल्लो समय बजारमा सार्वजनिक भएका केही गीत तीजको महत्त्व र मर्मविपरीत भएको भन्दै आलोचना भइरहेको छ ।