संक्रमणकालीन न्यायसम्बन्धी विधेयक सम्बन्धमा भएको सहमतिप्रति अन्तर्राष्ट्रिय समुदायको मूलभूत समर्थन रहेको नेकपा (माओवादी केन्द्र)का अध्यक्ष पुष्पकमल दाहाल प्रचण्डले दाबी गरेका छन् । सहमति पीडितमैत्री रहेको उनले जिकिर गरे । 

बुधवार प्रतिनिधिसभा बैठकमा संक्रमणकालीन न्यायसम्बन्धी विधेयकमाथिको सैद्धान्तिक छलफलमा भाग लिँदै प्रचण्डले विधेयक पीडितमैत्री रहेको बताएका हुन् । ‘यो विधेयक पीडितमैत्री हुन्छ कि हुँदैन भनेर हामीले लामो छलफल गर्यौं । मेलमिलापका नाममा पीडितलाई थप पीडा दिने हो कि भन्ने पनि कुरा आयो । अन्तर्राष्ट्रिय मूल्य–मान्यता अनुरूप हुन्छ कि हुँदैन भनेर पनि प्रश्न उठेको थियो,’ उनले भने, ‘विधेयकप्रति अन्तर्राष्ट्रिय समुदायको समेत मूलभूत समर्थन रहेको ब्यहोरा जानकारी गराउन चाहन्छु ।’

ढिलै भएपनि सत्य निरुपण र बेपत्ता छानबिन आयोगमार्फत शान्ति प्रक्रिया टुंगिने दिशामा अगाडि बढेको पूर्वप्रधानमन्त्रीसमेत रहेका प्रचण्डले बताए । प्रचण्डभन्दा अगाडि प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाले विधेयकबारे बोलेका थिए । 

संसदीय समितिबाट सर्वसम्मत भएको विधेयक संसदमा छलफल गरेर बुधवार नै पारित गर्ने तयारी छ । प्रधानमन्त्री ओलीले राष्ट्रियसभाबाट समेत १० दिनभित्र विधेयक पारित गर्ने तयारी रहेको बताए ।