२३ असार २०८३, मंगलबार
जेलजीवन बिताइरहेकी म्यान्मारकी प्रजातन्त्रवादी नेतृ आङ सान सुकीलाई वर्षौंसम्म नजरबन्दमा राखिएको लेकसाइडस्थित घर बिहीवार दोस्रो पटक लिलामीका लागि राखिएको छ ।
सन् २०२१ को सैन्य ‘कू’पछि हिरासतमा लिइएकी नोबेल पुरस्कार विजेता सुकी र उनका भाइबीच दशकौं लामो विवादपछि दुई तले घर र १.९ एकड जमिन बिक्रीका लागि राखिएको थियो ।
लिलामीका लागि न्यूनतम ३०० अर्ब क्याट (१४ करोड अमेरिकी डलर) तोकिएको थियो ।
जग्गा किनबेचको काम गर्ने एक स्थानीय बिचौलियाले मार्चमा एएफपीलाई बताएअनुसार याङ्गुन आसपासका क्षेत्रमा पनि यो जमिन र यस्तै आकारका घरको मूल्य १० देखि २० लाख अमेरिकी डलरभित्र पाइन्छ ।
लिलामीअघि म्यान्मारका लागि अमेरिकी दूतावासनजिकै युनिभर्सिटी एभिन्यूमा रहेको औपनिवेशिक कालको घरबाहिर पत्रकारको सानो भीड जम्मा भएको थियो ।
गेटमाथि सुकीका पिता, स्वतन्त्रताका नायक आङ सानको चित्र राखिएको छ भने घरलाई सशस्त्र प्रहरीले पहरा दिइरहेको छ ।
स्थानीय अदालतले ढोकामा टाँसेको सूचनामा घर, घरभित्र रहेको सम्पत्ति र जग्गा सुकीकी आमा ‘दाउ खिन की’को नाममा रहेको उल्लेख छ ।
सन् १९८८ मा तत्कालीन जुन्ताविरुद्ध भएको विशाल प्रदर्शनका क्रममा सुकीलाई गोली हानेपछि सेनाले करिब १५ वर्षसम्म घरको भत्किएको पर्खालभित्र थुनेर राखेको थियो ।
इङ्गल्यान्डमा आफ्ना पति र छोराछोरीबाट अलग्गिएकी सुकीले घरमा पियानो बजाउँदै, जासुसी उपन्यास पढ्दै र ध्यान गर्दै घरमा समय बिताएकी थिइन् ।
प्रजातन्त्र र अहिंसाको माध्यमबाट सैन्य शासनविरुद्ध लड्ने उनको भाषण सुन्न सयौँ मानिस नियमित रूपमा घरबाहिरको फुटपाथमा भेला हुने गर्थे ।
सन् २०१० मा रिहा भएपछि पनि उनले त्यही घरमा बसी विदेशी नेता, पत्रकार र कूटनीतिज्ञहरूसँग भेटवार्ता गरेकी थिइन् ।
सन् २०१२ मा तत्कालीन अमेरिकी राष्ट्रपति बाराक ओबामाले सुकीको घरको अवलोकन गरेका थिए । ओबामाले सुकीलाई ‘लोकतन्त्रकी प्रतीक’को संज्ञा दिएका थिए ।
सुकीले सन् २०१२ मा याङ्गुन छोडेकी थिइन् र सेनासँग सत्ता साझेदारी गर्दै राजधानी न्यापित गएकी थिइन् ।
सन् २०२१ को फेब्रुअरी १ मा सेनाले पुनः सत्ता कब्जा गरेपछि उनलाई हिरासतमा लिइएको थियो र १० वर्ष लामो प्रजातन्त्रको प्रयोग अन्त्य गरेको थियो ।
सुकीको गिरफ्तारीले दक्षिणपूर्वी एसियाली राष्ट्र म्यान्मारमा रक्तपातपूर्ण उथलपुथल निम्त्याएको छ भने निर्वाचित सरकारको सट्टा सेनाप्रति बफादार (जुन्टा सरकार)ले सत्ता चलाइरहेको छ।
