२५ जेठ २०८३, सोमबार
आइसीसी विश्वकप लिग टु सिरिजअन्तर्गत क्यानडाले लगातार चौथो हार बेहोरेको छ । नेदरल्यान्ड्समा अमेरिका, क्यानडा र घरेलु टोलीबीचको त्रिकोणात्मक सिरिजको पाँचौ खेलमा अमेरिकाले क्यानडामाथि ५० रनको जीत हात पारेको हो ।
अमेरिकाले प्रस्तुत गरेको २७६ रनको लक्ष्य पछ्याएको क्यानडाले ४७ ओभरमा २२५ रन मात्रै बनाएर अल आउट भयो । क्यानडाका लागि पर्गत सिंहले ८० बलमा सर्वाधिक ७२ र श्रेयस माभ्भाले ९५ बलमा ६८ रन जोडे ।
आदित्य भरान्दराजनले २५, ओपनर आरोन जोनसनले १०, कप्तान निकोलस किर्तनले ९ रन जोडे । अमेरिकाका लागि शाल्डि भान साक्वयले ४, जसदिप सिंह र हरमित सिंहले समान २ तथा यासिर मोहम्मद र नोस्तुश केन्जिगेले १ विकेट लिए ।
त्यसअघि टस हारेर ब्याटिङको निम्तो पाएको अमेरिकाले निर्धारित ५० ओभरमा ८ विकेट गुमाएर २ ७५ रन जोडेको थियो । अमेरिकाका लागि ओपनर स्मिथ पटेलले सर्वाधिक ७० रन जोडे । आरोन जोन्सले ५०, मिलान्ड कुमारले ४७, स्टेभन टेलरले ४६, कप्तान मोनांक पटेलले २६ रन जोडे ।
क्यानडाका लागि साद विन जाफरले ३, कलिम सानाले २ र डिलोन हेलिङ्गरले १ विकेट लिए । जितसँगै ८ टोली सहभागी लिग टु मा ४ अंकका साथ अमेरिका पाँचौ स्थानमा उक्लिएको छ ।
