२८ जेठ २०८३, बिहीबार
सिंगापुरमा सोमबार सम्पन्न एसियाली खेलकुदको छनोट क्रिकेट प्रतियोगितामा नेपाल च्याम्पियन बनेको छ ।
नेपालले वर्षाबाट प्रभावित फाइनलमा हङ्कङलाई ‘डकवर्थ एन्ड लुइस’ नियमका आधारमा १९ रनले हराउँदै उपाधि कुम्ल्याएको हो ।
टस हारेर पहिले ब्याटिङ गरेको हङ्कङले निर्धारित २० ओभरमा सात विकेट गुमाएर एक सय ८८ रन बनाएको थियो ।
जवाफी ब्याटिङमा ओर्लिएको नेपालले ११.३ ओभरमा केवल दुई विकेट गुमाएर एक सय १४ रन बनाएपछि वर्षा शुरू भएको थियो ।
त्यसपछि लामो समय वर्षा नरोकिएकाले नेपाललाई ‘डकवर्थ एन्ड लुइस’ नियमका आधारमा १९ रनले विजयी घोषित गरिएको हो ।
वर्षाका कारण खेल स्थगित हुँदा नेपालका लागि रोहित पौडेल २४ बलमा एक छक्का र तीन चौकाको मद्दतले ३५ रन बनाउँदै क्रिजमा थिए ।
कप्तान दीपेन्द्रसिंह ऐरी पनि चार बलमा एक चौकाको मद्दतले नौ रन बनाउँदै क्रिजमा थिए । ऐरीले आफ्नो ट्वान्टी-२० अन्तर्राष्ट्रिय ‘करियर’मा यही खेलमार्फत १०० खेल पूरा गरेका छन् ।
सन् २०१८ जुलाई २९ तारिखमा नेदरल्याण्ड्सविरुद्ध लण्डनको लड्समा पहिलो ट्वान्टी-२० आई खेलेका उनले आज भएको हङ्कङविरुद्धको खेलमा १०० खेल पूरा गरेका हुन् ।
नेपालका लागि ओपनर कुशल भुर्तेलले पनि ६५ रनको योगदान गरे । कुशलले केवल ४० बलको सामना गरी तीन छक्का र आठ चौका पनि हिर्काए । अर्का ओपनर आसिफ शेख भने पहिलो बलमै पेभेलियन फर्किएका थिए ।
कुशलले टी–२० अन्तर्राष्ट्रिय क्रिकेटमा अर्धशतकको सँख्या १५ पुर्याएका हुन् । २९ वर्षीय कुशलले टी–२० अन्तर्राष्ट्रिय क्रिकेटमा तीनवटा शतक पनि बनाएका छन् ।
यो छनोट प्रतियोगितामै उनले दुईवटा शतक बनाए । कुशलले अन्तर्राष्ट्रिय क्रिकेटमा बनाएको अर्धशतकको संख्या २४ पुगेको छ । उनले एकदिवसीय अन्तर्राष्ट्रिय क्रिकेटमा पनि दुई शतक र नौवटा अर्धशतक बनाएका छन् ।
त्यसअघि, हङ्कङका लागि ओपनर अंशुमन रथले उत्कृष्ट अर्धशतकीय पाली खेलेका थिए । विकेटकिपर ब्याट्सम्यान शाहिद वासिफले पनि अर्धशतक बनाए ।
अनुभवी ब्याट्सम्यान अंशुमनले टोलीका लागि ८० रनको योगदान गरे । लामो समय क्रिजमा टिकेका उनले ४५ बलमा ६ छक्का र ६ चौका पनि हिर्काए ।
विकेटकिपर ब्याट्सम्यान शाहिद वासिफले पनि टोलीको खातामा ५५ रन थपे । पाँचौँ नम्बरमा क्रिज समाल्न आएका उनले केवल २८ बलको सामना गरी तीन छक्का र सात चौका हिर्काए ।
शिव माथुरले पनि टोलीको खातामा २६ रन थपे । चौथो नम्बरमा क्रिज समाल्न आएका उनले २१ बलमा एक छक्का र दुई चौका पनि प्रहार गरे ।
नेपाली टोलीका बलर शेर मल्ल एक्लैले चार विकेट लिए । उनले चार ओभरमा ३२ रन खर्चिए । करण केसीले पनि दुई विकेट हात पारे । सन्दीप लामिछानेले पनि एक विकेट कुम्ल्याए ।
यो प्रतियोगिताको सेमिफाइनलमा पुग्ने चारवटै टोली नेपाल, हङ्कङ, मलेसिया र ओमान यसअघि नै आगामी एसियाली खेलकुदमा छनोट भएका छन् ।
प्रतियोगितामा मलेसियाले तेस्रो स्थानमा हासिल गर्यो । तेस्रो स्थानका लागि सोमबार नै खेलिएको खेलमा मलेसियाले ओमानलाई आठ विकेटले हरायो ।
एसियाली खेलकुदको २०औँ संस्करण आगामी सेप्टेम्बर १९ देखि अक्टोबर ४ तारिखसम्म जापानमा आयोजना हुँदैछ ।
