०५ साउन २०८३, मंगलबार
नेपाल उद्योग वाणिज्य महासंघ (एफएनसीसीआई)का अध्यक्ष चन्द्रप्रसाद ढकालले सरकारले अख्तियार दुरुपयोग अनुसन्धान आयोगको कार्यक्षेत्रभित्र निजी क्षेत्रलाई तान्नुपर्ने अवस्था नरहेको बताएका छन् । नेपाल उद्योग तथा व्यवसायी महासङ्घले शुक्रवार काठमाडौंमा आयोजना गरेको अन्तरक्रिया कार्यक्रममा उनले अख्तियारलाई जोडेर निजी क्षेत्रलाई निरुत्साहित बनाउने गरी कानून निर्माण नगर्न सुझाव दिए ।
‘निजी क्षेत्रलाई हेर्ने करिब डेढ दर्जन नियामक निकाय छन् । यसर्थ अख्तियारको कार्यक्षेत्रभित्र निजी क्षेत्रलाई तान्नु पर्ने अवस्था छैन । यसैले निजी क्षेत्रलाई निरुत्साहित बनाउने गरी कानून निर्माण गर्नु हुँदैन । निजी क्षेत्रमैत्री कानूनी व्यवस्था र नीति निर्माण तहमा निजी क्षेत्रको सहभागिताले नै आर्थिक समृद्धि हासिल हुन्छ,’ उनले भने, ‘राजनीतिक तथा सरोकारवालाहरूले यसमा ध्यान दिनुपर्ने आवश्यक छ ।’
सो अवसरमा अध्यक्ष ढकालले देशको अर्थतन्त्रमा सुधारका संकेत देखिएको बताए । ‘शेयर बजारमा उत्साह थपिएको छ भने घरजग्गा कारोबार पनि बिस्तारै बढ्न थालेको पाइएको छ,’ उनले भने, ‘कर्जाको मागमा पनि सुधार भइरहेकाले यसलाई अझै चलायमान बनाउन आवश्यक रहेको छ ।
ढकालले पर्यटक आगमन बढिरहेको तथा रेमिट्यान्समा हालसम्मकै उच्च देखिएको पनि जानकारी दिए ।
‘विदेशी मुद्राको सञ्चिति पर्याप्त हुँदा भुक्तानी सन्तुलन सहज अवस्थामा आएको छ । यसले लगानीकर्ताहरूलाई विश्वासमा लिई काम गर्न सहज वातावरण रहेको छ,’ उनले थपे ।
अध्यक्ष ढकालले अर्थ मन्त्रालयले आर्थिक सुधारका लागि आयोग बनाउने विषयलाई कार्य योजनामा समेटिएको कुरा स्वागतयोग्य रहेको बताए ।
‘जुन पहिलेदेखि हामीले उठाउँदै आएका थियौँ । यसका लागि अर्थमन्त्री विष्णु पौडेललाई धन्यवाद ज्ञापन गर्न चाहन्छु,’ उनले भने ।
उद्योग व्यवसायले खपत गर्ने विद्युतलाई कच्चापदार्थको रूपमा सुलभ दरमा उपलब्ध गराउन र ह्विलिङ चार्ज तिरेर सिधै बिजुली किन्ने व्यवस्था गरिनुपर्नेमा उनले जोड दिए ।
