२४ जेठ २०८३, आइतबार
इजरायली सेनाले लेबनानमाथि हमला गरेको छ । आफ्ना युद्ध विमानहरूले लेबनानस्थित हिजबुल्लाहका अखडाहरूमा आक्रमण आइतवार गरिरहेको इजरायली सेनाले जनाएको छ ।
हिजबुल्लाहले आफूतर्फ क्षेप्यास्त्र र रकेट प्रहार गर्ने प्रयास गरिरहेको थाहा पाएपछि आक्रमण गरिएको इजरायली पक्षको दाबी छ ।
हिज्बुल्लाहले पनि इजरायलको उत्तरतर्फ रहेका सैन्य निशानाहरूलाई केन्द्रित गरेर ३२० वटा रकेट प्रहार गरेको बीबीसीले जनाएको छ ।
देशको उत्तरी क्षेत्रलाई निशाना बनाए हिजबुल्लाहले प्रहार गरेका सयौँ रकेट ध्वस्त पारिएको इजरायली सेनाले जनाएको छ । प्रतिरक्षा र आक्रमण दुवैमा उच्च मनाेबलका साथ सेना क्रियाशील रहेको इजरायली सरकारको भनाइ छ ।
यता हिजबुल्लाहले भने यसलाई इजरायलमाथिको ‘पहिलो चरण’को आक्रमण भनेको छ । उसले अझै आक्रमण गर्ने चेतावनी दिएको छ ।
हिजबुल्लाहले एउटा विज्ञप्तिमार्फत इजरायलमाथिको रकेट हमला फुआद शुकरको हत्याको बदला भएको बताएको छ ।
सिया समूहका वरिष्ठ सैन्य कमान्डर शुकर जुलाईमा इजरायलले गरेको हवाई हमलाबाट लेबनानको राजधानी बेरुतमा मारिएका थिए ।
लेबनानमाथि आक्रमण गर्नुअघि इजरायलले ४८ घण्टे सङ्कटकाल घोषणा गरेको थियो । त्यो जारी छ ।
यता यसअघि अमेरिकाले हिजबुल्लाहमाथिको आक्रमणमा इजरायललाई आफ्नो समर्थन रहने जनाएको थियाे ।
इजरायल–हमास (प्यालेस्टाइन) तनाब मत्थर भइनसकेको अवस्थामा इजरायलले लेबनानमाथि आक्रमण गरेपछि मध्यपूर्वमा नयाँ तनाबको अवस्था सिर्जना भएको छ ।
