नेकपा (एमाले)का सांसद एवं पूर्वकानूनमन्त्री पदम गिरीले सुन तस्करीको पारदर्शी छानबिन भएको भए नेकपा (माओवादी केन्द्र)को हेडक्वाटर सबै तानिने दाबी गरेका छन् । पुष्पकमल दाहाल प्रचण्ड नेतृत्वको सरकारले सबैलाई उन्मुक्ति दिने काम गरेको उनले आरोप लगाए । 

बिहीवार प्रतिनिधिसभा बैठकको विशेष समयमा सांसद गिरीले प्रचण्डले कांग्रेस–एमाले सरकारलाई बिचौलियाले बनाएको भनेकोप्रति आपत्ति जनाएका हुन् । 

‘कमरेड प्रचण्डको नेतृत्वमा सरकार रहँदा सुन तस्करीमा इतिहास रच्ने काम भएको छ । सही र पारदर्शी ढंगले छानबिन भएको भए हेडक्वाटरमा कोही रहँदैनथ्यो होला, अहिले जेलको छिडीमा हुन्थे होला,’ उनले प्रश्न गरे, ‘सुन तस्करीमा सबैलाई उन्मुक्ति दिने काम भयो भएन ? म सुशासनको पक्षमा, बाँकी सबै बिचौलिया भन्ने न्याय संगत हुनुसक्छ ?’

सुशासनको गफ गरेपनि प्रचण्डले बालुवाटारको ललिता निवास प्रकरणमा निर्णय गर्ने पूर्वप्रधानमन्त्रीलाई उन्मुक्ति दिन बालुवाटारमा बैठक राखेको आरोप लगाए ।