२४ जेठ २०८३, आइतबार
कृषि विकास बैंकले ‘नाडा अटो शो’मा गाडी खरिद गर्न स्थिर ब्याजदरमा ८० प्रतिशतसम्म ऋण प्रदान गरिरहेको छ । मंगलवारदेखि भृकुटीमण्डपमा जारी ‘नाडा अटो शो २०२४’मा गाडी खरिद गर्नका लागि बैंकले स्थिर ब्याजदरमा ८० प्रतिशतसम्मको ‘अटो लोन’ प्रदान गरिरहेको हो ।
देशकै सबैभन्दा ठूलो अटोमोबाइल्सको प्रदर्शनी मेलामा बैंकहरूले सस्तोमा धमाधम ऋण प्रदान गर्ने घोषणा गरिरहेका छन् । गाडी खरिद गर्ने इच्छा भएकाहरूका लागि कृषि विकास बैंकले ७ वर्षसम्मको स्थिर ब्याजदरमा अटो लोन ल्याएको हो ।
कृषि विकास बैंकले अटो शोमा विद्युतीय गाडी खरिद गर्दा ८० प्रतिशतसम्म ऋण प्रदान गर्ने जनाएको छ । जसका लागि फ्लोट अर्थात परिवर्तितमा ७.९९ प्रतिशत र फिक्स अर्थात् स्थिरमा ८.९९ प्रतिशत ब्याजदरमा गाडी खरिदका लागि बैंकले ऋण प्रदान गरिरहेको छ ।
त्यस्तै, विद्युतीय गाडीबाहेक जुनसुकै इन्धनबाट चल्ने गाडी खरिद गर्नेहरूलाई ५० प्रतिशतसम्म बैंकले ऋण प्रदान गर्नेछ । इन्धन गाडीहरूका लागि पनि स्थिरमा ८.९९ प्रतिशत र चल्ती अर्थात् परिवर्तित ७.९९ प्रतिशत ब्याजदरमा ऋण प्रदान गरिनेछ ।
बैंकले ऋण प्रदान गर्दा लिने सर्भिस चार्जमा ३३ प्रतिशतको छुट दिइरहेको छ । जहाँ नाडा अटोबाट गाडी खरिद गर्नेहरूका लागि ०.५ प्रतिशत सर्भिस चार्ज लिइने जनाएको छ । सामान्यतया बैंकबाट ऋण लिँदा ०.७५ प्रतिशत सर्भिस चार्ज लिँदै आएको छ । तर, नाडा अटो शो २०२४ का लागि बैंकले विशेष अफरमा यस्तो स्थिर ऋण प्रदान गरिरहेको छ ।
यसका साथै बैंकले होम लोन, एजुकेसन लोन, बिजनेस लोन, सर्भिस लोनका साथै कृषि लोनलगायत विभिन्न लोन प्रदान गर्दै आइरहेको छ ।
