कोशी प्रदेश सभाको बैठक आज बस्दैछ । गत असार ८ गते बजेट पारित गरेपछि स्थगित भएको बैठक शुक्रबार दिउँसो १ बजे बस्ने भएको हो ।

लामो समय बैठक नराखेको भन्दै प्रमुख प्रतिपक्षी दल नेकपा (माओवादी केन्द्र)ले असन्तुष्टि जनाएको थियो । नेकपा एमालेले पनि बैठक राख्नुपर्ने माग राखेपछि सभामुख अम्बरबहादुर विष्टले बैठक बोलाएका हुन् । 

नेपाली कांग्रेस र नेकपा एमालेको गठबन्धन बनेको दुई महिना पुग्न लाग्दा पनि कांग्रेस सरकारमा सहभागी भएको छैन । तर, प्रदेश सभाको बैठकमा भने कांग्रेस सत्ता पक्षको रोहमा बस्ने भएको छ । कांग्रेसले सत्ता पक्षको रोहमा बस्ने जानकारी प्रदेश सभालाई दिएको छ । 

साउन ११ गते सरकारबाट बाहिरिएको माओवादी केन्द्र भने प्रमुख प्रतिपक्ष दलको हैसियतमा बैठकमा सहभागी हुने छ । 

सरकारमा सहभागी नभए पनि केन्द्रमा बनेको गठबन्धनका आधारमा सत्ता पक्षकै रोहमा बस्ने कांग्रेस संसदीय दलका उपनेता हिमाल कार्कीले बताए । यसअघि प्रमुख प्रतिपक्षी बनेको कांग्रेसले हिक्मत कार्की नेतृत्वको सरकारलाई समर्थनसमेत गरेको छैन । 

प्रदेश सभा सचिव गोपालप्रसाद पराजुलीका अनुसार प्रदेश सभामा सरकारले तीनवटा विधेयक दर्ता गरेको छ । शुक्रबार तीनवटै विधेयक टेबल हुने सम्भावना रहेको छ ।