३१ जेठ २०८३, आइतबार
भौतिक पूर्वाधार तथा यातायातमन्त्री देवेन्द्र दाहालले नारायणगढ–बुटवल सडकको काम चाँडो सक्नेगरी सरकार अघि बढेको बताएका छन् ।
प्रेस चौतारी नेपाल चितवन शाखाले आज आयोजना गरेको पत्रकार सम्मेलनमा बोल्दै उनले एक वर्षभित्र काम सम्पन्न गर्नेगरी सरकार अघि बढेको बताए ।
मन्त्री दाहालले एक वर्षभित्र काम सक्नेगरी निर्माण कम्पनीसँग सहमति भएको बताए । 'सडक निर्माणको काम शुरू भएको लामो समय भइसकेको छ तर, प्रगति हेर्दा ५४/५५ प्रतिशत मात्र काम भएको पाइएको छ । हामीले एक वर्षको म्याद थपेका छौँ, अब सोही अवधिमा जसरी पनि काम सक्नुपर्छ,' उनले भने ।
मुख्य राजमार्गका रूपमा रहेको सडक निर्माणका लागि नेपाल सरकारका तर्फबाट कुनै समस्या नभएको मन्त्री दाहालले बताए । 'सरकारका तर्फबाट दिनुपर्ने भुक्तानी रोकिएको छैन, दिइरहेको अवस्था छ । काम चाँडो सक्न ठेकेदार कम्पनीसँग बारम्बार छलफल भइरहेकाले अब प्रगति हुन्छ,' उनले भने ।
उनले बर्सात सकिएपछि कामको गति हेरिने र कामको गति बढाउन नसके सरकारले ठेकेदारको विकल्प खोज्ने प्रष्ट पारे ।
