कांग्रेस उपसभापति गुरुङ मुछिएको मितेरीसहितका सहकारीमा संसदीय समितिको अनुगमन

सहकारी संस्था बचत रकम दुरुपयोग सम्बन्धमा गठित संसदीय छानबिन विशेष समितिले मितेरी सहकारीमा स्थलगत अनुगमन गरेको छ ।

बिहीबार समितिका सभापति सूर्य थापासहितको टोलीले मितेरीसहित अन्य १३ सहकारीमा अनुगमन गरेको हो ।

मितेरी सहकारीको रकम हिनामिनामा नेपाली कांग्रेसका उपसभापति धनराज गुरुङ पनि मुछिएका छन् ।

समितिले मितेरी सहकारीका अध्यक्ष कुम्भराज गुरुङसँग रकम हिनामिनाबारे छलफल गरेको थियो ।

ललितपुरको महालक्ष्मीस्थानमा सञ्चालित मितेरी सहकारी पुगेको समितिले रकम हिनामिना प्रकरणमा नेपाली कांग्रेसका उपसभापति गुरुङ र उनकी पूर्वपत्नीसमेत मुछिएको विषयमा जवाफ मागेको थियो ।

समितिका सभापति थापाका अनुसार धनराज गुरुङ र उनकी पूर्व पत्नीले लिएको ऋणको विषयमा सोधपुछ गरिएको थियो । उनले भने, ‘बिहीबारको कार्यविधिअनुसार ३ वटा सरकारी निकाय र १३ वटा सहकारी संस्थाहरूको स्थलगत निरीक्षण गरेका थियौं ।’

समितिले नयाँ बानेश्वरस्थित सहकारी विभाग र सहकारी प्रशिक्षण केन्द्र र बुद्धनगरस्थित समस्याग्रस्त सहकारी व्यवस्थापन समितिको कार्यालयमा अनुगमन गरेको थियो ।

त्यस्तै सहकारीहरू मितेरीसहित स्वर्णलक्ष्मी, सुमेरु, सिभिल, गौतमश्री, कान्तिपुर कोअपरेटिभ, नेपाल सहकारी वित्तीय संस्था, लालीगुराँस, गोरखा सेभिङ, शिवशिखर र नागरिक विकास सहकारीको स्थलगत निरीक्षण, अवलोकन र वस्तुगत अवस्थिति अध्ययन गरेको सभापति थापाले जानकारी दिए ।

उनका अनुसार पुल्चोकस्थित शाखा कार्यालय रहेको गुण मल्टीप्रपोजले बचत फिर्ता गरेपछि सञ्चालन प्रक्रियाको समेत अवलोकन गरिएको थियो ।