सहकारी संस्था बचत रकम दुरुपयोगको अनुसन्धान गर्न बनेको संसदीय छानबिन विशेष समितिले आज प्रधानमन्त्री केपी शर्मा ओलीसँग छलफल गर्दैछ ।

अन्तिम प्रतिवेदन तयार गर्नु अघि समितिले आज प्रधानमन्त्री ओलीसँग छलफल गर्न लागेको समिति सदस्य ईश्वरी न्यौपानेले जानकारी दिइन् । 

प्रतिवेदन लेख्नु अघि आएका केही समस्याका विषयमा प्रधानमन्त्रीसँग छलफल गर्न लागेको न्यौपानेको भनाइ छ ।

‘कतिपय विषयमा सरकारले प्रष्ट नपार्दा हामीलाई समस्या भएको छ । कानूनका कतिपय विषय मिलाउनुपर्ने र सरकारले सहजीकरण गर्नुपर्ने विषय छन्,’ न्यौपानेले भनिन्, ‘यस विषयमा हामीले गृहमन्त्री, प्रहरी प्रशासनसँग पनि छलफल गरिसकेका छौं । यसै शिलशिलामा आज साँझ ५ बजे प्रधानमन्त्रीलाई पनि सिंहदरबारमा भेट्न लागेका हौं ।’

शुक्रबार समितिले गृहमन्त्रीसहित गृह सचिव गोकर्णमणि दुवाडी, प्रहरी महानिरीक्षक वसन्तबहादुर कुँवर र पहरी नायव महानिरीक्षक जनक भट्टराईसँग पनि भेट गरेको थियो । 

प्रधानमन्त्री ओली समितिको बैठकमै उपस्थित हुन लागेका हुन् । 

तीन महिना म्याद सकिएपछि भदौ २३ बाट समितिलाई १५ दिनको म्याद थपिएको थियो । समितिले असोजको पहिलो साता आसपास संसद्लाई प्रतिवेदन बुझाउने छ । 

समितिले देशभरका २९ वटा सहकारीमा भएको अर्बौं रकम अपचलनका विषयमा छानबिन गरिरहेको छ ।