०५ साउन २०८३, मंगलबार
सहकारी ठगी प्रकरणमा मुछिएका राष्ट्रिय स्वतन्त्र पार्टी (रास्वपा) सभापति रवि लामिछानेले २३ करोड ३७ लाखको चेकमा हस्ताक्षर गरेको खुलेको छ ।
सहकारी संस्था बचत रकम दुरुपयोगसम्बन्धी विशेष छानबिन समितिको प्रतिवेदनमा लामिछानेले उक्त रकम बराबरको चेक काटेर विभिन्न प्रोडक्सन हाउस र व्यक्तिलाई दिएको उल्लेख छ ।
उनले सन् २०२१ को डिसेम्बर २४ मा नोबडी प्रोडक्सन प्रालिका नाममा ६५ लाख, ६७ हजार १८७ रुपैयाँ ५० पैसाको चेक काटेका छन् ।
त्यस्तै त्यसको अघिल्लो दिन सोही प्रोडक्सनका नाममा उत्तिकै रकमको चेकमा रविको हस्ताक्षर छ ।
त्यसको ४ महिनाअघि अगस्त ४ मा नोबडी प्रोडक्सनकै नाममा काटिएको चेकमा १ करोड २७ लाख ३ हजार १२५ रुपैयाँ उल्लेख गरिएको छ ।
२०७८ को वैशाख ४ गते कला बिल्डिङ एन्ड कन्स्ट्रक्सन प्रालिका नाममा लामिछानेले १ करोड ३५ लाख ६० हजारको चेक काटेको समितिको प्रतिवेदनमा उल्लेख छ ।
त्यस्तै उनले २०७७ सालको चैत २० गते नोबडी प्रोडक्सनका नाममा १ करोडको चेक काटेका छन् । २०७७ को पुस १० गते कम्युनिकेशन एन्ड ब्रोडकास्टिङ प्रालिका नाममा १ करोड ५९ लाख ३० हजार ७५५ को चेक काटेका छन् भने त्यसको अर्को दिन सोही कम्पनीका नाममा सोही बराबरको रकमको चेक काटेका हुन् ।
२०७७ को कात्तिक २५ गते उनले रष्मितादेवी गुरागाईँ नाममा काटिएको ५० लाखको चेकमा हस्ताक्षर गरेका छन् । सोही दिन शम्भु गुरागाईँलाई दिइएको ५० लाखको चेकमा पनि उनको हस्ताक्षर छ ।
त्यस्तै २०७७ मङ्सिर ७ गते कम्युनिकेशन एन्ड ब्रोडकाष्टिङ प्रालिलाई काटिएको ३ करोडको चेकमा लामिछानेको हस्ताक्षर छ । अर्को दिन उनले सोही कम्पनीलाई २ करोडको चेक काटेका छन् ।
२०७७को पुस ६ गते नोबडी प्रोडक्सनका नाममा काटिएको १ करोड ५० लाखको चेकमा पनि लामिछानेले नै हस्ताक्षर गरेका छन् । सोही मितिमा कम्युनिकेशन एन्ड ब्रोडकास्टिङलाई काटिएको २ करोड ५७ लाख ९९ हजार ९६६को चेकमा पनि लामिछानेले नै हस्ताक्षर गरेका थिए ।
उक्त कम्पनीका नाममा २०७७ को पुस ८ गते २ करोड र माघ ७ गते १ करोड ५९ लाख ३० हजार ७५५ रुपैयाँको चेक काटिएको छ । दुवैमा लामिछानेको हस्ताक्षर छ ।
स्वेट सेयर लिएर गोर्खा मिडिया नेटवर्क प्रालिको सेयर सदस्य रहेको तर सहकारी ठगीसँग सम्बन्धित कुनै काम नगरेको दाबी गरेका लामिछानेले जम्मा २३ करोड ३७ लाख ९८ हजार ७ सय ३१ रुपैयाँ बराबरको चेक काटेको समितिको प्रतिवेदनमा उल्लेख छ ।
