०१ असार २०८३, सोमबार
टोकियो– जापानको भूकम्प प्रभावित क्षेत्र इशिकावामा भारी वर्षाका कारण आएको बाढी र पहिरोमा परी शनिवार एक जनाको मृत्यु हुनुका साथै कम्तीमा सातजना बेपत्ता भएका छन् । सरकारले विज्ञप्तिमार्फत घटनाको पुष्टि गरेको हो ।
बाढीका कारण वाजिमामा भूकम्प प्रभावित सडक मर्मत गरिरहेका अन्य चारजना पनि बेपत्ता भएको भूमि मन्त्रालयका अधिकारी कोजी यामामोटोले बताएका छन् ।
जापानको क्योडो समाचार एजेन्सीले वाजिमामा १० जना बेपत्ता भएको जनाएको छ ।
इशिकावा सरकारका अनुसार बाढीका कारण धेरै भवनहरू डुबानमा परेका छन् सडक अवरुद्ध छ भने करिब ६ हजार घर बिजुलीविहीन भएका छन् ।
प्रभावित क्षेत्रका केही मानिसहरू सञ्चार सेवाबिहीन भएको अपरेटरहरूले बताएका छन् ।
बाढी पहिरोको खतराको बीच वजिमामा र सुजुका साथै नोटो सहरका बासिन्दाहरूलाई घर छोडेर सुरक्षित स्थानमा जान आदेश दिएको अधिकारीहरूले बताएका छन् ।
इशिकावाकोे निगाता र यामागाता प्रान्तका बासिन्दाहरूलाई सुरक्षित स्थानमा जान आदेश दिएको विपद् व्यवस्थापन विभागले जनाएको छ ।
जापान मौसम विज्ञान बिभाग (जेएमए)ले जीवन जोखिममा पार्ने सल्लाह दिँदै इशिकावाका लागि उच्च–स्तरको चेतावनी जारी गरेको छ ।
प्रधानमन्त्री फुमियो किशिदाले प्राथमिकताका साथ जनताको जीवन बचाइ विपद् व्यवस्थापन गर्न सरकारी अधिकारीलाई निर्देशन दिएका छन् ।
