२८ जेठ २०८३, बिहीबार
गोरखाबाट काठमाडौंका लागि छुटेको एउटा बस तीन दिनदेखि सम्पर्कविहीन भएको छ ।
शुक्रवार धार्चे गाउँपालिका–७ लापुबेसीबाट काठमाडौंका लागि छुटेको ना ४ ख २२७० नम्बरको यात्रुवाहक बस सम्पर्कविहीन भएको गोरखा प्रहरीले आइतवार जनाएको छ ।
उक्त बस शुक्रवार राति १० बजे धादिङको नौबीसेसम्म आएपछि सम्पर्कविहीन भएको जिल्ला प्रहरी कार्यालय, गोरखाका डीएसपी रमेशकुमार श्रेष्ठले लोकान्तरलाई जानकारी दिए ।
उनका अनुसार उक्त बस लापुबेसीबाट बिहान ७ बजे छुटेको थियो ।
‘मुग्लिनसम्म आउँदा चालकसहित ३–४ जना यात्रु रहेको पाइएको छ । त्यसयता बसमा कति यात्रु चढे थाहा भएन । नौबीसे आएपछि सम्पर्कविहीन भएको छ,’ उनले भने ।
बसको खोजी कार्य जारी गरेको डीएसपी श्रेष्ठले बताए ।
