बाराको जीतपुरसिमरा उपमहानगरपालिका तत्कालीन प्रमुख प्रशासकीय अधिकृत शिवराज सेढाईंसहित दुई वटा सप्लायर्सविरुद्ध विशेष अदालतमा दर्ता भएको भ्रष्टाचार मुद्दामा सफाई दिएपछि अख्तियार दुरुपयोग अनुसन्धान आयोगले सर्वोच्च अदालतमा पुनरावेदन निवेदन दिएको छ । 

आयोगले २०७९ असार १० गते तत्कालीन प्रमुख प्रशासकीय अधिकृत शिवराज सेढाईंविरुद्ध २ करोड २० लाख २८ हजार ९० रुपैयाँ राजस्व रकम चुहावट गरेको आरोपमा मुद्दा दायर गरेको थियो । सेढाइले बालगंगा खोलाबाट खोलाजन्य पदार्थ उत्खनन गर्न न्यू पाथिभरा सप्लायर्सलाई दिएको राजस्व रकम १ करोड २० लाख २८ हजार ९० रुपैयाँ र पसाहा खोलाबाट खोलाजन्य पदार्थ उत्खनन गर्न न्यू पाथिभरा सप्लायर्सलाई दिएको राजस्व रकम ९९ लाख ९९ हजार ९९९ रुपैयाँ गरी  २ करोड २० लाख २८ हजार ९० रुपैयाँ राजस्व रकम चुहावट गरी भ्रष्टाचार गरेको अख्तियारको आरोप थियो ।

आयोगका सहायक प्रवक्ता देवी प्रसाद थपलियका अनुसार आयोगले न्यू पाथिभरा सप्लायर्स, हेटौंडा–४, मकवानपुरकी प्रोपाइटर मीनाकुमारी श्रेष्ठविरुद्ध १ करोड ६६ लाख ७२ हजार ६ सय रुपैयाँ र ओम सप्लायर्सका प्रोपाइटर ओम शंकर प्रसादविरुद्ध १ करोड ३८ लाख ९९ हजार ९९८ रुपैयाँ बिगोे र कैद सँजायको मागदावीसहित मुद्दा दायर गरेको छ । 

तर, विशेषले २०८० माघ ८ गते उनीहरुलाई सफाई दिएको थियो । विशेषले तथ्य प्रमाण र मुचुल्काको समेत अध्ययन नगरि प्रतिवादीहरुलाई सफाई दिएको भन्दै उक्त फैसला बदर भागीको माग गर्दै आयोगले पुनरावेदनमा निवेदन दिएको हो ।