०५ साउन २०८३, मंगलबार
पूर्वराष्ट्रपति विद्यादेवी भण्डारीले बडादशैँ पर्वले सम्पूर्ण नेपालीबीचको सामाजिक–सांस्कृतिक ऐक्यबद्धतालाई सुदृढ गर्दै न्यायपूर्ण‚ समतामूलक‚ सभ्य एवं सुसंस्कृत समाज निर्माणका लागि क्रियाशील रहन प्रेरणा प्रदान गरोस् भन्ने कामना गरेकी छिन् ।
बडादशैँका अवसरमा शुक्रवार सम्पूर्ण नेपाली दिदीबहिनी तथा दाजुभाइहरूमा शुभकामना व्यक्त गर्दै उनले यस्तो कामना गरेकी हुन् ।
पूर्वराष्ट्रपति भण्डारीले यस वर्ष दशैँको पूर्वसन्ध्यामा आइपरेको मनसुनजन्य प्राकृतिक विपद्का कारण उत्पन्न परिस्थितिले धेरैलाई यो दशैँ अलि असहज भएको पनि बताएकी छिन् ।
‘यो दशैँ पर्वलाई हामीले आ–आफ्नो परिवेश, परिस्थिति र गच्छेअनुसार तडकभडकरहित, मितव्ययी र खुसियालीका साथ मनाउनु पर्दछ,’ शुभकामना सन्देशमा उनले भनेकी छिन् ।
