०८ साउन २०८३, शुक्रबार
नेकपा एमालेले केन्द्रीय कार्यालय बनाउन जग्गा दान लिन निर्णयको विरोध गर्ने तीन नेतालाई सात दिने स्पष्टीकरण सोधेको छ ।
मंगलबार महासचिव शंकर पोखरेलले नेताहरू भीम रावल, विन्दा पाण्डे र उषाकिरण तिमल्सिनालाई स्पष्टीकरण सोधेका हुन् ।
केन्द्रीय कमिटी सदस्य तिमल्सिनाले पार्टी संस्थापनको निर्णयविरुद्ध किन गएको र विधानको धारा ८१ अनुसार किन कारबाही नगर्ने भन्दै स्पष्टीकरण पत्र आएको जानकारी दिइन् ।
सात दिनभित्रमा स्पष्टीकरणको जवाफ दिन भनिएको छ ।
एमालेले विवादित व्यापारी मीनबहादुर गुरुङबाट १० रोपनी १४ आना जग्गा दान लिने र उनले नै केन्द्रीय कार्यालय बनाइदिने निर्णय गरेको थियो ।
गुरुङकै उपस्थितिमा प्रधानमन्त्री एवं एमाले अध्यक्ष केपी ओलीले कीर्तिपुर नगरपालिका २ मैत्री नगरमा दशैंको बेला कार्यालय भवनको शिलान्यास गरेका थिए ।
विवादित व्यापारी र व्यवसायीबाट दान लिएको भन्दै पार्टीभित्रै विरोध भएको थियो ।
यसैले एमालेको सचिवालय बैठकले पार्टी लाइनविपरीत बोलेको भन्दै तीन नेतालाई स्पष्टीकरण सोध्ने निर्णय गरेको थियो ।
नेतात्रयको अभिव्यत्तिले पार्टीको प्रतिष्ठा र मर्यादामा आँच पुगेको भन्दै सचिवालयको बैठक अनुसार एमालेले स्पष्टीकरण सोधेको हो ।
