०९ साउन २०८३, शनिबार
काठमाडौंबाट भारतको नयाँ दिल्ली उड्न लागेको एयर इण्डियाको विमानमा बम राखेको सूचना मिथ्या भएको पुष्टि भएको छ ।
विमानमा सवार यात्रुलाई ओरालेर जाँच गर्दा कुनै पनि विस्फोटक पदार्थ नभेटिएको त्रिभुवन अन्तर्राष्ट्रिय विमानस्थल सुरक्षा कार्यालयका एसएसपी डम्बर विकले लोकान्तरलाई जानकारी दिए ।
'एयर इन्डियाको विमानमा बम राखेको सूचना मिथ्या भएको पुष्टि भएको छ,' उनले भने, 'विमानमा विस्फोटक पदार्थ भेटिएन । केही बेरमै जहाज उड्ने तयारीमा छ ।'
एयर इण्डियाको एआई–२१६ विमानमा बमको हल्लापछि विमानको जाँच गरिएको थियो ।
विमानको जाँच प्रक्रिया चलिरहँदा पनि विमानस्थलको आन्तरिक र अन्तर्राष्ट्रिय दुवै उडान सामान्यरूपमा सञ्चालन भएको थियो ।
दिउँसो २ बजे काठमाडौं विमानस्थलमा अवतरण भएको एयर इण्डियाको विमानमा बम राखेको अज्ञात समूहबाट जानकारी आएपछि नेपाली सेना र नेपाल प्रहरीको विशेष टोलीले जाँच गरेका थिए ।
सो विमान काठमाडौंबाट एक यस ५८ यात्रु लिएर दिल्ली उड्ने तयारीमा थियो ।
यसअघि यही कात्तिक ६ गते भारतको विमान सेवा कम्पनी भिस्तारा एयरको विमानमा बम राखेको हल्ला फैलिएपछि त्रिभुवन अन्तर्राष्ट्रिय विमानस्थलमा नेपाली सेनाको विस्फोटक पदार्थ निष्क्रिय गर्ने विशेष टोलीले खानतलासी गरेको थियो ।
