२८ जेठ २०८३, बिहीबार
नेपाल वायुसेवा निगमको जहाजबाट सोमबार टिकापुर विमानस्थलमा परीक्षण उडान गरिएको छ। निगमको जहाज ९एन–एबीयूबाट कैलालीको उक्त विमानस्थलमा परीक्षण उडान गरिएको प्रवक्ता रमेश पौडेलले जानकारी दिए ।
उनका अनुसार परीक्षण उडानको लागि जहाज नेपालगन्जबाट स्थानीय समय अनुसार अपराह्न १२ः४५ मा उडान भरी १३ः१५ मा टिकापुर विमानस्थलमा अवतरण भएको थियो । उक्त परीक्षण उडानमा नेपाल वायुसेवा निगम र नेपाल नागरिक उड्डयन प्राधिकरणका प्राविधिकहरूको संयुक्त टोली सम्मिलित रहेको उनले बताए ।
निगमले जहाजको उपलब्धता भएसँगै नेपालगन्ज–टिकापुर–नेपालगन्ज सेक्टरमा यथासक्य चाँडै नियमित उडान सञ्चालन गर्ने प्रतिबद्धता जनाएको छ । यसका लागि निगमका कार्यकारी अध्यक्ष युवराज अधिकारीको विशेष निर्देशन रहेको पौडेलको भनाइ छ ।
