०१ असार २०८३, सोमबार
जङ्गली हात्तीको आक्रमणबाट रौतहटको फतुवा–विजयपुर नगरपालिका वडा नम्बर ११ बुट्वा–राङी गाउँमा एक वृद्धाको मृत्यु भएको छ ।
आफ्नै घरमा सुतिरहेको अवस्थामा आज हात्तीले आक्रमण गर्दा ७० वर्षीया पातली तामाङको बिहान मृत्यु भएको इलाका प्रहरी कार्यालय विजयपुरका प्रहरी निरीक्षक इन्द्रमणि अधिकारीले जानकारी दिए ।
प्रहरी निरीक्षक अधिकारीका अनुसार जङ्गली हात्तीले बिहान एक्कासि आक्रमण गर्दा वृद्धाको मृत्यु भएको हो भने उनका श्रीमान्ले भागेर ज्यान बचाएका छन् । घर पूर्णरूपमा क्षति भएको तथा सँगैको अर्को घरमा समेत हात्तीले क्षति पुर्याएको प्रहरीले जनाएको छ ।
घटना भएको जानकारी प्राप्त हुनासाथ जिल्लास्थित नेपाल प्रहरी, डिभिजन बन कार्यालय र सशस्त्र बेस क्याम्प विजयपुरको प्रहरी टोली बुट्वा–राङी गाउँ पुगी स्थानीयसँगको सोधपुछपछि अहिले थप अनुसन्धान प्रक्रियामा जुटेको प्रहरीले जनाएको छ ।
