एयर इन्डियाको जहाजमा बम रहेको सूचनापछि सबै यात्रुलाई ओरालेर चेकजाँच गरिएको छ ।

त्रिभुवन अन्तर्राष्ट्रिय विमानस्थलबाट १६८ यात्रु लिएर शनिबार दिउँसो दिल्ली फर्किन लागेको जहाजमा बम रहेको सूचना आएपछि सबै यात्रु ओरालेर चेकजाँच गरिएको हो ।

जाँचका क्रममा विमान केही पनि विस्फोटक पदार्थ नभेटिएको विमानस्थल प्रहरी प्रमुख एसएसपी डम्बरबहादुर विकले लोकान्तरलाई जानकारी दिए ।

'सबै यात्रुलाई ओरालेर जाँच गर्दा केही पनि भेटिएन, अब केहीबेरमा जहाजले उडान भर्नेछ,' उनले भने ।

उनका अनुसार दिल्ली फ्लाइटको तयारी गरिरहेका बेला शनिबार दिउँसो ४ बजेर ३१ मिनेटमा बम रहेको सूचना आएको थियो ।​ ​​

दिल्ली जानका लागि सबै यात्रुको बोर्डिङ भई सकेको थियो । साथै यात्रुहरूको लगेज ब्यागसमेत लोड गरिसकिएको थियो ।

सबै लगेजहरू झारेर पुन: कुकुर समेतको प्रयोग गरी जाँच भएको एसएसपी विकले बताए ।

जहाजमा केही पनि विस्फोटक पदार्थ नभेटिएपछि उडानको तयारी गरिएको हो ।