२० असार २०८३, शनिबार
आगामी मंसिर १६ गते कोशी प्रदेशमा एक पालिका अध्यक्षसहित ९ पदका लागि उपनिर्वाचन हुँदैछ । एक पालिका अध्यक्ष, एक जिल्ला समन्वय समिति प्रमुख र ७ जना वडाध्यक्ष चयनका लागि प्रतिस्पर्धा हुन लागेको हो ।
मोरङको ग्रामथान गाउँपालिकामा अध्यक्ष चयनका लागि निर्वाचन हुँदैछ । २०७९ सालको निर्वाचनमा नेपाली कांग्रेसबाट निर्वाचित जयप्रकाश गच्छदारको हृदयाघातका कारण मृत्यु भएपछि ग्रामथानमा उपनिर्वाचन हुन लागेको हो ।
यहाँको चुनाव रोचक बन्ने देखिएको छ । कांग्रेस र नेकपा (माओवादी केन्द्र)ले उम्मेदवार छनोट गरिसकेका छन् । कांग्रेसले बलराम सरदारलाई उम्मेदवार बनाउने भएको छ । माओवादीले कांग्रेसबाट भित्र्याइएका पूर्व वडाध्यक्ष नवोनारायण माझीलाई उम्मेदवार बनाउने घोषणा गरिसकेको छ ।
नेकपा एमाले भने उम्मेदवार चयनको प्रक्रियामै छ । एमालेले ३ जनाको नाम सिफारिश गरेको छ । गाउँपालिका कमिटीबाट ११ जनाको नाम सिफारिश भएर आएकोमा जिल्लाबाट तुलसी विश्वास, कृष्णकुमार माझी र निर्मला अधिकारीको नाम प्रदेशमा सिफारिश गरिएको एमाले मोरङ इन्चार्ज जीवन घिमिरेले जानकारी दिए ।
विश्वास र माझीमध्ये एकजना उम्मेदवार बन्ने सम्भावना रहेको नेताहरू बताउँछन् । पालिका र जिल्लामा पठाएका नामका आधारमा कात्तिक २४ गते उम्मेदवारको नाम टुंगो लगाउने एमाले प्रदेश कमिटीले जनाएको छ ।
अध्यक्षको उम्मेदवारमा दाबी गरिरहेका माझी भने तत्कालीन झोराहाट गाउँ विकास समितिका अध्यक्ष हुन् । उनी २०५४ सालमा एमालेका तर्फबाट झोराहाट गाविस अध्यक्षमा विजयी भएका थिए । उनी २०७४ मा ग्रामथान २ मा वडाध्यक्ष बनेका थिए ।
एमालेका अर्का आकांक्षी तुलसी विश्वास पार्टी गाउँ कमिटी उपाध्यक्ष हुन् । उनी २०७९ को निर्वाचनअघि कांग्रेसबाट एमाले प्रवेश गरेका हुन् ।
माओवादीले पनि कांग्रेसबाट प्रवेश गराएकालाई उम्मेदवार बनाएपछि कांग्रेसभित्रको अन्तरविरोधमा खेलेर चुनाव जित्ने रणनीतिमा एमाले रहेको छ ।
अघिल्लो निर्वाचनमा यो पालिकाको अध्यक्षमा कांग्रेसका जयप्रकाश गच्छदार थारू ७ हजार ६०५ मत ल्याएर निर्वाचित भएका थिए । उनका निकटतम् प्रतिद्वन्द्वी एमालेका शिवनारायण माझी थारूले ६ हजार ९३ मत पाएका थिए ।
यसैगरी, झापाको कन्काई नगरपालिका– ६ मा वडाध्यक्षका लागि उपनिर्वाचन हुँदैछ । सो वडामा एमालेबाट दीर्घबहादुर थापा अध्यक्षमा निर्वाचित भएका थिए ।
तेह्रथुमको लालीगुराँस नगरपालिका– ८ मा पनि उपनिर्वाचन हुँदै छ । सो वडामा कांग्रेसबाट तेजमान लिम्बू अध्यक्ष निर्वाचित भएका थिए ।
सुनसरीको गढी गाउँपालिका– ६ मा एमालेबाट निर्वाचित वडाध्यक्ष षडानन्द उराउ झाँगरको मृत्यु भएपछि उपनिर्वाचन हुने भएको हो ।
यस्तै, ओखलढुंगाको मोलुङ गाउँपालिका– ५ मा पनि उपनिर्वाचन हुँदैछ । सो वडामा कांग्रेसबाट वडाध्यक्षमा गोपीकृष्ण कार्की निर्वाचित भएका थिए । उनको निधन भएपछि उपनिर्वाचन हुँदैछ ।
उदयपुरको त्रियुगा नगरपालिका– १२ मा कांग्रेसबाट निर्वाचित वडाध्यक्ष चुडाराज काफ्लेको निधन भएपछि उपनिर्वाचन हुन लागेको हो । उदयपुरकै बेलका नगरपालिका– ९ मा कांग्रेसबाट निर्वाचित वडाध्यक्ष पदमबहादुर खड्काको निधन भएपछि चुनाव हुँदैछ ।
यसैगरी, जिल्ला समन्वय समिति ओखलढुंगाको रिक्त प्रमुखका लागि समेत मंसिर १६ मै निर्वाचन हुँदैछ । कांग्रेसबाट समन्वय समितिको प्रमुख निर्वाचित डिल्लीराम खनालको गत वर्ष असोजमा निधन भएको थियो । ओखलढुंगा जिल्ला समन्वय समिति प्रमुखमा कांग्रेसको एकलौटी बहुमत पुग्नेछ । समन्वय समितिका लागि पालिका प्रमुख/उपप्रमुख तथा अध्यक्ष/उपाध्यक्षले मतदान गर्न पाउँछन् । जसमा कांग्रेससँग ८ मत रहेको छ भने अन्यदलहरूसँग जम्मा ७ मत छ ।
एक मत भने स्वतन्त्र रहेको छ । मानेभञ्ज्याङ गाउँपालिकाको अध्यक्षमा निर्वाचित ज्ञानेन्द्र रुम्दाली स्वतन्त्र हुन् । अघिल्लोपटक उनले कांग्रेसलाई सघाएका थिए । उनले यसपटक पनि कांग्रेसलाई सघाउने सम्भावना रहेको नेताहरू बताउँछन् ।
यहाँ कांग्रेसले जित्ने पक्का जस्तै भएपछि अन्य दल चुपचाप छन् ।
ताप्लेजुङको सिरजिङ्गा गाउँपालिका वडा नम्बर ३ मा पनि उपनिर्वाचन हुँदैछ । एक वर्षअघि वडाध्यक्ष दिलप्रसाद बोखिम हङकङ गएपछि यहाँ निर्वाचन हुन लागेको हो ।
बोखिमले उतैबाट राजीनामा पठाएपछि उपनिर्वाचन हुन लागेको निर्वाचन कार्यालयले जनाएको छ । उनी कांग्रेसबाट निर्वाचित हुन् ।
ताप्लेजुङको सिरिजंगा गाउँपालिका– ३, झापाको कन्काई नगरपालिका– ६, तेह्रथुमको लालीगुराँस नगरपालिका– ८, सुनसरीको गढी गाउँपालिका– ६, ओखलढुंगाको मोलुङ गाउँपालिका– ५, उदयपुरको त्रियुगा नगरपालिका– १२ र बेलका नगरपालिका– ९ मा वडाध्यक्ष पदका लागि उपनिर्वाचन हुँदैछ ।
