प्रतिकूल मौसमका कारण रास्वपा सभापति रवि लामिछानेलाई रुपन्देही ल्याउने कार्यमा ढिलाइ भएको छ । मौसमको खराबीका कारण पोखराबाट जहाज उड्न नसक्दा उनलाई रूपन्देही ल्याउन ढिलाइ भएको हो । 

भैरहवा ल्याउन बिहान ५ बजे नै एयरपोर्ट पुर्याइएका उनलाई भिजिबिलिटी नहुँदा जहाज उड्न नसककेपछि मध्याह्नसम्म ल्याउन सकिएको छैन । 

यसअघि साढे १० बजे जहाज उड्ने तयारी थियो । त्यसका लागि रविलाई जहाजमा समेत बसाइएको थियो । तर, अझै भिजिबिलिटी कम भन्दै जहाज नउडेपछि उनलाई प्रतिक्षा कक्षमा झारिएको रूपन्देही प्रहरीका प्रवक्ता डीएसपी लक्ष्मी खनालले जानकारी दिइन् । 

भैरहवामा बिहान बोक्लो हुस्सु र कुहिरो लागेको थियो । अहिले पनि हुस्सु पूर्णतया हटिसकेको छैन । 

बुटवलमा रहेको सुप्रिम बचत तथा ऋण सहकारी संस्थाको बचतकर्ताको बचत रकम तथा ऋण हिनामिना गरेको आरोपमा किटानी जाहेरी परेपछि प्रहरीले लामिछानेलाई रुपन्देही ल्याउन लागिएको हो । 

कात्तिक ८ गते रुपन्देही जिल्ला अदालतले लामिछानेसहितका आरोपीलाई पक्राउका लागि पुर्जी जारी गरेको थियो ।

कात्तिक २ गते काठमाडौंबाट पक्राउ परेका उनलाई त्यसै राति पोखरा लगिएको थियो । 

भैरहवा विमानस्थलमा  भिजिविलिटी नपुगेपछि पोखरा बुद्ध एयरको जहाजमा चढिसकेका रवि लामिछानेलाई झारेर प्रतिक्षा कक्षमा राखिएको छ ।