२८ जेठ २०८३, बिहीबार
‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
नेपाल पत्रकार महासंघको शुक्रबार सम्पन्न निर्वाचनको अन्तिम नतिजा घोषणा भएको छ। आइतबार सार्वजनिक अन्तिम मतपरिणामअनुसार अध्यक्षमा निर्मला शर्मा ४ हजार २८२ मतसहित विजयी भएकी छन् । उनले निकटतम प्रतिद्वन्द्वी रमेश विष्टलाई पराजित गरेकी हुन् ।
निर्वाचन समितिका अनुसार वरिष्ठ उपाध्यक्षमा दीपक आचार्य ४ हजार २३० मतका साथ विजयी भएका छन् भने महिला उपाध्यक्षमा नितु पण्डित ४ हजार ७०५, उपाध्यक्ष समावेशीमा उमित प्रसाद बागचन्द ४ हजार २९२ मतका साथ विजयी भएका छन् ।
यसैगरी महासचिवमा रामप्रसाद दाहाल ४ हजार २९२, खुला सचिवमा रमेश खतिवडा, महिला सचिवमा सोनी शर्मा, दलित सचिवमा प्रकाश धौलाकोटी, एसोसियट सचिवमा वैकुण्ठ राज पराजुली, कोषाध्यक्षमा रामकृष्ण अधिकारी निर्वाचित भएका छन् । निर्वाचनबाट अधिकांश पदमा सत्ता गठबन्धन निकट निर्मलाको प्यानल विजयी भएको हो ।
००००
प्रधानसेनापति अशोकराज सिग्देल छिमेकी मुलुक भारतको औपचारिक भ्रमण पूरा गरी आइतबार स्वदेश फर्किएका छन् ।
भारतका स्थलसेनाध्यक्ष जनरल उपेन्द्र द्विवेदीको निमन्त्रणामा छिमेकी मुलुकको भ्रमण सम्पन्न गरी फर्किएका प्रधानसेनापति सिग्देललाई बलाध्यक्ष रथी प्रदीपजङ्ग केसीले त्रिभुवन अन्तर्राष्ट्रिय विमानस्थलमा स्वागत गरे ।
००००
नेपाल आयल निगमले पेट्रोलको मूल्य बढाएको छ । डिजेल र मट्टितेलको मूल्य भने घटाएको छ ।
निगम सञ्चालक समितिको आइतबारको बैठकले राति १२ बजेदेखि लागू हुने गरी पेट्रोलमा प्रतिलिटर दुई रुपैयाँ तथा डिजेल र मट्टितेलमा प्रतिलिटर दुई रुपैयाँ घटाएको हो ।
निगमले पहिलो वर्गका लागि पेट्रोल प्रतिलिटर एक सय ५९ रुपैयाँ ५० पैसा, दोस्रो वर्गका लागि प्रतिलिटर एक सय ६१ रुपैयाँ र तेस्रो वर्गका लागि प्रतिलिटर एक सय ६२ रुपैया तोकेको छ ।
००००
नेकपा एमालेले पार्टी र नेतृत्वविरुद्धका षडयन्त्र तथा कुप्रचारको प्रतिवाद गर्दै निर्णय गरेको छ । पार्टी नीति, नेतृत्व र राजनीतिक कार्यदिशालाई जनताबीच स्थापित गर्ने संकल्प एमालेको छ ।
राष्ट्रिय कार्यशालाका निष्कर्ष सार्वजनिक गर्दै एमालेले नेतृत्वविरुद्धका षडयन्त्र र कुप्रचारको जमेर प्रतिवाद गर्ने संकल्प गरेको हो ।
००००
मोरङको धनपालथान गाउँपालिका– ३ मा रहेको उमागौरी कृषि सहकारी ठगी प्रकरणमा सार्वजनिक लेखा समिति सभापति ऋषिकेश पोखरेलकी पत्नी अंजला कोइरालासहित २६ जनाविरुद्ध २२ करोड ४८ लाखको बिगो दाबी गरिएको छ । प्रहरी अनुसन्धान प्रतिवेदनका आधारमा उनीहरूलाई उक्त बिगो माग दाबी गरिएको हो ।
सरकारी वकिलको कार्यालय मोरङले दायर गरेको अभियोगपत्रमा ८ हजार ८ सय ४२ जना शेयर सदस्यहरूको ३ करोड ८ लाख ८० हजार ३ सय रुपैयाँ शेयर रकम रहेको र ७०७ जना ऋणीहरूले २४ करोड ३० लाख २२ हजार ८ सय रुपैयाँ संस्थाबाट ऋण लिएको लिएको पाइएको उल्लेख गरिएको छ ।
००००
काठमाडौंको कागेश्वरी मनोहरा नगरपालिका– ८ स्थित बागमतीको तीरमा आत्मदाह गरेकी कमला आचार्यको सुसाइड नोट भेटिएको छ ।
शनिबार भएको घटनाको घटनास्थलबाट प्रहरीले बरामद गरेको सुसाइड नोटमा आचार्यले आफ्ना श्रीमानसँग क्षमा मागेकी छन् । उनले लेखेकी छिन्, ‘सरी बुढा ।’
००००
नेपाल बैंक लिमिटेडका तत्कालीन उपप्रबन्धक शशीकिरण श्रेष्ठ पक्राउ परेका छन् ।
भ्रष्टाचार मुद्दामा दोषी ठहर भएका उनलाई काठमाडौंको स्वयम्भूबाट पक्राउ गरिएको जिल्ला प्रहरी परिसर काठमाडौंका प्रवक्ता एवं प्रहरी उपरीक्षक नवराज अधिकारीले जानकारी दिए ।
००००
विराटनगर किङ्सलाई पराजित गर्दै काठमाडौं गुर्खाजले प्लेअफ सम्भावना जीवित राखेको छ ।
कीर्तिपुरस्थित त्रिवि मैदानमा आइतबार भएको खेलमा काठमाडौं १ विकेटले विजयी भयो । ११८ रनको लक्ष्य काठमाडौंले १८ ओभर १ बलमा ९ विकेट गुमाएर पूरा र्गयो ।
००००
नेपाली कांग्रेसका प्रवक्ता प्रकाशशरण महतले आयोजनाको प्रभावकारिता र प्राथमिकताका आधारमा ऋण लिएर कार्यान्वयन गर्नुपर्नेमा जोड दिएका छन् ।
नेपाल प्रेस युनियन पर्साद्वारा आइतबार पर्सामा आयोजित पत्रकार सम्मेलनमा पूर्वअर्थमन्त्रीसमेत रहेका महतले यस्तो बताएका हुन् ।
