०५ साउन २०८३, मंगलबार
‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
राष्ट्रिय स्वतन्त्र पार्टी (रास्वपा) का सभापति रवि लामिछानेको राजनीतिक भविष्य अन्योलमा परेको छ । सहकारी ठगीसहित तीन अभियोगमा आइतबार मुद्दा दायर भएसँगै उनको आगामी राजनीतिक भविष्य अदालतको हातमा पुगेको छ ।
अदालतले सफाइ दिएको खण्डमा उनलाई राहत मिल्नेछ अन्यथा उनले तत्काल सांसद पद गुमाउनेछन् भने आगामी संसदीय राजनीतिक यात्रामा पनि धक्का लाग्न सक्नेछ ।
यसैबीच मुद्दा दायर भएसँगै लामिछानेको सोमबारदेखि बयान र त्यसपछि थुनछेक बहस हुने भएको छ । सोमबार मुद्दा गोला प्रथामा गएपछि न्यायाधीशको बेन्च तय हुनेछ।
आइतबार लामिछानेविरुद्ध सहकारी ठगीसँगै, सङ्गठित अपराध र सम्पत्ति शुद्धीकरणसम्बन्धी कसुरमा कास्की जिल्ला अदालतमा मुद्दा दायर भएको हो ।
हाल लामिछाने पोखराको सूर्यदर्शन सहकारीको बचत रकम अपचलन गरेको आरोपमा पक्राउ परी जिल्ला प्रहरी कार्यालय कास्कीको हिरासतमा छन् ।
उनीविरुद्ध सम्पत्ति शुद्धीकरणमा रु २७ करोड ८९ लाख ४४ हजार सात सय पाँच र सहकारी ठगीतर्फ रु तीन करोड ३७ लाख ६५ हजार बिगो दाबीसहित मुद्दा दायर गरिएको जिल्ला सरकारी वकिलको कार्यालय, कास्कीका सहायक जिल्ला न्यायाधिवक्ता शान्तिदेवी शर्माले जानकारी दिइन् ।
कुल ६३ जनालाई विभिन्न चरणमा प्रतिवादी बनाएर दायर मुद्दामा सहकारी ठगीतर्फमात्रै १ अर्ब ५१ करोड रुपैयाँ मागदाबी गरिएको छ।
००००
सम्पत्ति शुद्धीकरणको मुद्दा दायर भएपछि रास्वपा सभापति रवि लामिछानेको सांसद पद स्वतः निलम्बनमा पर्ने भएको छ ।
सम्पत्ति शुद्धीकरण (मनी लाउन्डरिङ) निवारण ऐन, २०६४ को दफा (२७) बमोजिम रविको सांसद स्वतः निलम्बन हुने भएको हो ।
मुद्दाको अन्तिम किनारा नलाग्दासम्म उनको सांसद पद निलम्बनको माग कास्की जिल्ला अदालतमा दायर भएको अभियोग पत्रमा पनि गरिएको छ ।
००००
रास्वपाका लामिछानेविरुद्ध कास्की जिल्ला अदालतमा मुद्दा दायर भएपछि प्रहरीले यसबारे संघीय संसद सचिवालयलाई जानकारी गराएको छ । सचिवालयमा पत्र पुगेसँगै अब यसबारे आवश्यक निर्णय हुने जनाइएको छ ।
००००
आफूलाई सामाजिक अभियन्ता बताउँदै आएका निकोलस भुसाल पक्राउ परेका छन् ।
केही दिनअघि हिरासतमा सुतिरहेका रास्वपा सभापति रवि लामिछानेको फोटो सार्वजनिक गरेको आरोपमा प्रहरीले उनलाई पक्राउ गरेको हो ।
उनलाई राजधानीबाट आइतबार पक्राउ गरिएको काठमाडौं उपत्यका अपराध अनुसन्धान कार्यालयका प्रमुख एसएसपी सानुराम भट्टराईले जानकारी दिए ।
००००
सरकारले नेपाल प्रहरीमा जनपद समूहतर्फ रिक्त रहेको प्रहरी अतिरिक्त महानिरीक्षक पदमा २ जनालाई बढुवा तथा पदस्थापन गरेको छ।
प्रहरी नायब महानिरीक्षकद्वय दुर्गा सिंह र भरतबहादुर बोहरालाई बढुवा गरी क्रमशः प्रहरी प्रधान कार्यालय, मानवस्रोत विकास विभाग र प्रहरी प्रधान कार्यालय प्रदेश समन्वय विभागमा पदस्थापन गरिएको हो ।
००००
आपराधिक लाभको मुद्दामा मुछिएकी निलम्बित प्रहरी इन्स्पेक्टर विनु शाहीलाई जिल्ला प्रहरी परिसर ललितपुरको हिरासतमा पठाइएको छ ।
प्रहरीको फरार सूचीमा रहेकी शाही आइतबार निवेदन साथ ललितपुर जिल्ला अदालतमा उपस्थित भएकी थिइन् । तर बयानको क्रम जारी नै रहेकाले उनलाई जिल्ला प्रहरी परिसर ललितपुरको थुनामा पठाइएको हो ।
००००
नेपाल स्टक एक्सचेन्ज (नेप्से) दोहोरो अङ्कले घटेको छ ।
साताको पहिलो कारोबारका दिन नेप्से परिसूचक १३.५३ अङ्कले घटेर २५८३.२९ को विन्दुमा अडिएको हो ।
००००
नेपाली कांग्रेसका नेता डा शेखर कोइरालाले पार्टीको १५औं महाधिवेशनमा सभापतिको चुनाव लड्ने बताएका छन् ।
कैलालीको धनगढीमा नेपाल प्रेस युनियनले आयोजना गरेको पत्रकार सम्मेलनमा कोइरालाले सभापतिमा चुनाव लड्ने उल्लेख गरेका हुन् । सभापति जित्नेमा शतप्रतिशत विश्वस्त रहेको कोइरालाको दाबी छ ।
००००
नेकपा एमालेले सचिवालय बैठक बोलाएको छ । आउँदो बुधबार केन्द्रीय कार्यालय च्यासलमा बस्नेगरी सचिवालय बैठक बोलाइएको हो ।
