पूर्वराष्ट्रपति विद्या भण्डारी राजनीतिमा फर्किने चर्चाका बीच पूर्वउपराष्ट्रपति नन्दबहादुर पुन नेकपा माओवादी केन्द्रको राजनीतिमा फर्किएका छन् ।​

धुम्बाराहीमा आइतबारबाट शुरू भएको केन्द्रीय कमिटीको बैठकमा पुनः पदाधिकारीको लहरमा अध्यक्षसँगै बसेका छन् । उपाध्यक्षको लहरमा पुन अध्यक्ष प्रचण्डसँगै देखिएका छन् । अध्यक्ष प्रचण्डपछिको वरीयतामा पुनलाई माओवादीले स्थान दिएको छ ।

पछिल्लो समय माओवादीमा फर्किने चर्चाका बीच केन्द्रीय कमिटीको बैठकबाट पुनः औपचारिक रूपमा पार्टीगत कार्यक्रममा देखिएका हुन् ।

जारी बैठकमा अध्यक्ष, वरिष्ठ उपाध्यक्ष, उपाध्यक्ष र महासचिव पहिलो लहरमा छन् ।

माओवादीमा पुनको सक्रिय राजनीतिप्रति देखिने गरी विरोध भएको छैन । तर एमालेमा भण्डारीको सक्रिय राजनीति गर्ने विषय विवादित बन्न पुगेको छ ।

माओवादीले पार्टी जागरण अभियान, आन्तरिक संगठन, राजनीतिक कार्यदिशासहितका विषयमा छलफल गर्दैछ ।

आइतबार अध्यक्षले समसामयिक राजनीतिक विषय, राजनीतिक प्रस्ताव पेश गर्दैछन् । प्रदेशका अध्यक्षले पनि रिपोर्टिङ गर्दैछन् ।