२३ असार २०८३, मंगलबार
साताको पहिलो दिन आइतबार २६३५.०९ बिन्दुमा खुलेको शेयर बजार यस साता २५८८.६२ को बिन्दुमा बन्द भएको छ ।
पुस २८ देखि माघ ३ गतेसम्ममा नेप्से परिसूचक ४६.४७ अंकले घटेर २५८८.६२ को बिन्दुमा बन्द भएको हो ।
साताको पहिलो कारोबार दिन उच्च अंकले घटेको शेयर बजारमा साताको अन्तिम कारोबार दिन पनि गिरावट देखियो । यस साता तीन दिन घटेको नेप्से परिसूचक एक दिन झिनो अंकले बढ्यो ।
साताभर परिसूचकले २६५४.८२ को उच्चतम र २५८०.४० को न्यूनतम् बिन्दुलाई परीक्षण गर्दा बजारमा २२ अर्ब ४० करोड रुपैयाँ बढीको कारोबार भयो ।
अघिल्लो साता (पुस २१ देखि पुस २५ गतेसम्म) शेयर बजारमा ४८.८६ अंकको वृद्धि हुँदा ३० अर्ब २६ करोड रुपैयाँ बराबरको कारोबार भएको थियो ।
यस्तो रह्यो साताको कारोबार
साताको पहिलो कारोबार दिन आइतबार नेप्से परिसूचक २५.४२ अंकले घटेर २६०९.६७ को बिन्दुमा बन्द भएको थियो । आइतबार ३ अर्ब ९९ करोड रुपैयाँको कारोबार भएको थियो ।
त्यस्तै, साताको दोस्रो कारोबार दिन सोमबार १५.५४ अंकले घटेर परिसूचक २५९४.१३ को बिन्दुमा बन्द भयो । यस दिन बजारमा ६ अर्ब ६५ करोड रुपैयाँको कारोबार भएको थियो ।
साताको तेस्रो कारोबार दिन मंगलवार सार्वजनिक बिदाले गर्दा सेयर बजार बन्द रह्यो । बुधवार खुलेको शेयर बजार १.८३ अंकले वृद्धि भयो ।
बुधवार ५ अर्ब ८२ करोड रुपैयाँको कारोबार भएको थियो । र, साताको अन्तिम कारोबार दिन बिहीबार ७.३४ अंकले घटेर परिसूचक २५८८.६२ को बिन्दुमा बन्द भयो ।
यस दिन बजारमा १ करोड १७ लाख ४९ हजार ७०१ कित्ता शेयर खरिदबिक्री हुँदा ५ अर्ब ९३ करोड ३७ लाख रुपैयाँको कारोबार भयो ।
