नेपाली कांग्रेसका सभापति शेरबहादुर देउवाले पार्टीभित्रको मतभेद अन्त्य गरेर एकता भएमा यही प्रणालीमा पनि पार्टीले बहुमत ल्याउन सक्ने दाबी गरेका छन् । आन्दोलनमार्फत नेपालमा स्थापित व्यवस्था उत्कृष्ट भएको उनले दाबी गरे ।

कास्कीको पोखरामा कांग्रेस गण्डकी प्रदेशले सोमबार आयोजना गरेको कार्यक्रममा देउवाले एकढिक्का भएको खण्डमा यही प्रणालीअनुसार पनि बहुमत ल्याउन सकिने बताएका हुन् । ‘संविधानमा बहुमत प्राप्त गर्न त्यति सजिलो छैन, आफूलाई मतभेद बिर्सेर एकता भएको खण्डमा कांग्रेसले बहुमत प्राप्त गर्न सक्दछ,’ देउवाले भने ।

अहिलेको मिश्रित प्रणालीमा कुनै पनि दलले बहुमत ल्याउन मुस्किल पर्ने भनेर पार्टीभित्रै निर्वाचन प्रणाली फेर्नेबारे बहस भइरहेको बेला देउवाले यही प्रणालीमा पनि बहुमत ल्याउन सकिने बताएका हुन् ।

पार्टीका संस्थापन बीपी, गणेशमान, कृष्णप्रसाद भट्टराईलगायतले सुम्पेको जिम्मेवारी पूरा गर्न पार्टीमा एकता जरुरी रहेको उनले बताए । ‘सबैलाई साथमा लिएर हिँड्न जरुरी छ । अहिलेका चुनौती सामना गर्नका लागि एक हुन जरुरी छ,’ देउवाले भने ।

सभापति देउवाले नेपालको संविधान समावेशी रहेकोले यसलाई समुन्नत बनाउनु पर्ने बताए । ‘देशको संविधान र राजनीति पनि समावेशी छ । समानुपातिक व्यवस्था छ । सबैलाई प्रतिनिधित्व हुने काम संविधानले गरेको छ । हाम्रोमा जस्तो कुनै पनि देशमा समावेशी राजनीति छैन । हामीले उत्तम व्यवस्था स्थापित गरेका छौं,’ देउवाले भने ।