काठमाडौं महानगरपालिकाभित्रका सामुदायिक विद्यालयमा एकै दिन ९७१ जना बालबालिका भर्ना भएका छन् । माघ २१ गते मनाइएको सरस्वती पूजाका दिन ९७१ जना बालबालिका प्रारम्भिक बाल विकास कक्षा (इसीडी)मा भर्ना भएको महानगरले जनाएको छ । 

बालविकास कक्षमा भर्ना हुनेमा ५३२ जना छात्रा र ४३९ छात्र रहेका छन् । कन्या माध्यमिक विद्यालय न्होखामा सबैभन्दा धेरै विद्यार्थी भर्ना भएका छन् । कन्यामा ६५ जना छात्रा भर्ना भएका हुन् । 

ज्ञानोदय माध्यमिक विद्यालय, बाफलमा ६० जना, जनपथ माध्यमिक विद्यालय, कलंकीमा ४२ जना, कुलेश्वर माध्यमिक विद्यालय, कुलेश्वरमा ४१ जना विद्यार्थी भर्ना भएको महानगरले जनाएको छ । यस्तै, नीलवाराही माध्यमिक विद्यालय, टंकेश्वर, सरस्वती निकेतन माध्यमिक विद्यालय, व्रह्मटोल, सितला माध्यमिक विद्यालय, बालाजुमा ४०/४० बालबालिका भर्ना भएका छन् । 

प्रारम्भिक बाल विकास कक्षामा बाल केन्द्रित सिकाइको स्तर वृद्धि गर्न महानगरले काठमाडौं विश्वविद्यालयसँगको स्कूल टिच प्रोग्रामअन्तर्गत पूर्वाधार, उपलब्धता, उपलब्ध सामग्रीको प्रयोग, शिक्षकको क्षमता लगायत कोणबाट अध्ययन गरेको थियो । 

सहरी योजना आयोगका सदस्य इञ्जिनियर शैलेन्द्र झाका अनुसार अध्ययनले देखाएको आवश्यकता पूर्ति गर्दै बाल बिकासका कक्षाको स्तर वृद्धिमा काम भइरहेको छ । यसअन्तर्गत विद्यार्थीको संख्या, उपलब्ध स्थानलगायत स्थानको आधारमा ८१ वटा विद्यालयका प्रारम्भिक बाल विकास कक्षामा शिक्षण सिकाइ सामग्रीका लागि ८ करोड ६५ लाख रुपैयाँ पठाइएको छ । 

यस्तै शिक्षकलाई २ चरणमा ४८ घण्टे तालिम प्रदान गरिएको छ । यसपछि आया र इसीडीका अतिरिक्त सहजकर्ता पठाउने तयारी छ ।

महानगरपालिकाभित्र ८७ वटा सामुदायिक विद्यालय छन् । यीमध्ये ८१ वटामा प्रारम्भिक बाल विकास कक्षा छन् ।