नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले जनता समाजवादी पार्टी (जसपा) नेपालका अध्यक्ष उपेन्द्र यादव सरकारमा जाने सम्भावना कम रहेको दाबी गरेका छन् । उपेन्द्र सरकारमा सहभागी नभए अध्यादेश पनि पारित नहुने उनले जिकिर गरे । 

जनकपुर विमानस्थलमा सोमबार पत्रकारहरूसँग कुरा गर्दै अध्यक्ष प्रचण्डले उपेन्द्र यादव सरकारमा जाने सम्भावना आफूले नदेखेको बताएका हुन् । ‘आफ्नो एजेन्डा छाडेर उपेन्द्रजी सरकारमा जानुहुन्छ जस्तो लाग्दैन । उहाँले अडान छाड्नु भएन भने राष्ट्रियसभाबाट अध्यादेश पारित हुँदैन,’ प्रचण्डले भने । 

फरक प्रसंगमा प्रचण्डले केपी ओली नेतृत्वको सरकारबाट सुशासनको अपेक्षा गर्न नसकिने टिप्पणी गरे । ‘यो सरकार जनताको पक्षमा सुशासनको पक्षमा बनेको होइन । संविधान मिचेर बनेको सरकार हो, मैले संविधानको धारा ७६ (२) अनुसार विश्वासको मत पाउन नसकेपछि सिधै ३ मा गएर ठूलो दलको सरकार बन्नु पर्ने हो, तर संविधान मिचेर सरकार बनाइयो,’ प्रचण्डले भने । 

महोत्तरीमा आयोजना गरिएका कार्यक्रममा सहभागी हुन प्रचण्ड सोमबार बिहानै जनकपुर पुगेका हुन् ।