२४ जेठ २०८३, आइतबार
पोखरामा शनिबार भएको बेलुन विस्फोटमा परेर घाइते भएका उपप्रधानमन्त्री एवं अर्थमन्त्री विष्णु पौडेल र पोखरा महानगरपालिकाका प्रमुख धनराज आचार्यको स्वास्थ्यबारे जानकारी लिन सभामुख देवराज घिमिरे कीर्तिपुर बर्न अस्पताल पुगेका छन् ।
उनी केहीबेर अघि अस्पताल पुगेको उपप्रधानमन्त्री पौडेलको सचिवालयले जनाएको छ ।
उपप्रधानमन्त्री पौडेल र मेयर आचार्यको बर्न अस्पतालमा उपचार भइरहेको छ । चिकित्सकहरूले उनीहरूको अवस्था खतरामुक्त रहे पनि निगरानीमै उपचार गर्न आवश्यक रहेको बताएका छन् । दुवै जनालाई आईसीयूमा राखिएको छ ।
पोखरा भ्रमण वर्ष २०२५ को औपचारिक उद्घाटन गर्ने क्रममा बेलुन उडाउन खोज्दा आगोमा परेर पड्किँदा अर्थमन्त्री पौडेल र मेयर आचार्य घाइते भएका थिए।
सभामुख घिमिरेलाई अस्पतालका निर्देशक किरण किशोर नकर्मीलगायत उपचारमा संलग्न चिकित्सकले मन्त्री पौडेल र मेयर आचार्यको स्वास्थ्य अवस्था र उपचार प्रक्रियाबारे जानकारी गराए ।
यसअघि आइतबार नै राष्ट्रपति रामचन्द्र पौडेल पनि अस्पताल पुगेर दुवैजनाको स्वास्थ्य अवस्थाबारे जानकारी लिएका थिए । स्वास्थ्यमन्त्री प्रदीप पौडेल, गृहमन्त्री रमेश लेखकसहितका नेताहरू शनिबार साँझै अस्पताल पुगेरका अर्थमन्त्री पौडेल र मेयर आचार्यको स्वास्थ्यबारे जानकारी लिएका थिए ।
