०५ साउन २०८३, मंगलबार
राष्ट्रिय प्रजातन्त्र पार्टी (राप्रपा)ले यही फागुन २५ गते काठमाडौंमा गर्ने भएको आमसभा स्थगित गरिएको छ ।
बुधबार केन्द्रीय कार्यालय धुम्बाराहीमा बसेको पदाधिकारी बैठकले त्यो दिनको आमसभा स्थगित गरेर पूर्वराजा ज्ञानेन्द्र शाहको स्वागतका लागि विमानस्थल पुग्ने निर्णय गरेको हो । फागुन २५ मा ज्ञानेन्द्र पोखराबाट काठमाडौं फर्किँदैछन् । उनी लामो समयदेखि पोखरामै छन् ।
पोखरामै रहेका बेला ज्ञानेन्द्रले फागुन ७ गते प्रजातन्त्र दिवसका दिन एक सन्देश जारी गरेका थिए । राजतन्त्र पुनर्स्थापनाको माग गरिरहेको राप्रपा ज्ञानेन्द्रको उक्त सन्देशबाट हौसिएको छ । बुधबारको पदाधिकारी बैठकले ज्ञानेन्द्रको सन्देशको स्वागत गर्ने निर्णय समेत गरेको छ ।
बैठकमा समसामयिक राजनीतिक परिस्थितिको समीक्षा, देशभर भइरहेका पार्टीका कार्यक्रम एवं संगठन निर्माणको अवस्थाबारे समीक्षा भएको प्रवक्ता एवं प्रचार विभाग प्रमुख मोहन कुमार श्रेष्ठले जानकारी दिए ।
संवैधानिक राजसंस्था पुर्स्थापनाको एजेन्डालाई अझै सशक्त र प्रभावकारी बनाएर लैजाने बैठकले निर्णय गरेको श्रेष्ठले बताए ।
