‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
सिरहामा दलितमाथि ज्यादती गरेको घटनामा प्रहरीले दुई जनालाई पक्राउ गरेको छ । 

पक्राउ पर्नेमा औरही गाउँपालिकाका अध्यक्ष शिवजी यादव र पूर्व वडाध्यक्ष दिलीप यादव रहेका छन् । 

जिल्ला प्रहरी कार्यालय सिराहाका प्रवक्ता डिएसपी वीरेन्द्रकुमार पासवानले उनीहरुमाथि अनुसन्धान भइरहेको बताए ।

महायज्ञ लगाउनका लागि सिरहाको औरही–५ का दलित दीपक मलिक डोमको घर भत्काउने घटनामा उनीहरुको संलग्नता रहेको बताइएको छ ।
००००
परराष्ट्रमन्त्री आरजु राणा देउवाले आफ्नो हालको भारत भ्रमण कूटनीतिक सम्बन्ध विस्तारमा फलदायी भएको बताएकी छन् ।
भारतको विदेश मन्त्रालयले नयाँ दिल्लीमा मार्च १७ देखि २० सम्म आयोजना गरेको राइसिना डायलगमा सहभागी भएर शुक्रबार स्वदेश फर्किएपछि उनले त्रिभुवन अन्तर्राष्ट्रिय विमानस्थलमा पत्रकारहरूसँग यो कुरा खुलाएकी हुन् ।
००००
जेलेस्पीजङ्घ कार्कीको निर्णायक गोलसँगै नेपालले सिङ्गापुर विरूद्ध ३६ वर्षपछि जित निकालेको छ ।

सिङ्गापुर नेसनल स्टेडियममा शुक्रबार सम्पन्न मैत्रीपूर्ण खेलमा नेपालले  सिङ्गापुरमाथी १–० को जित निकालेको हो ।

नेपालको जितमा जेलेस्पीले खेलको पहिलो हाफमा गरेको गोल नै निर्णायक गोल बन्यो । उनले १२औँ मिनेटमा मनिष डाँगीको क्रसमा गोल गरेका हुन् । सिङ्गापुर विरूद्ध नेपालले गरेको यो नै पहिलो गोल हो ।
००००
राजसंस्था पुनस्र्थापनाका लागि संयुक्त जनआन्दोलन समिति मातहतको आन्दोलन परिचालन समितिको बैठक राप्रपाका महामन्त्री धवल शमशेर राणाको अध्यक्षतामा शुक्रबार बसेको छ । 

बैठकले राणाको संयोजकत्वमा सबैलाई एक ठाउँमा ल्याउन आन्दोलन परिचालन समिति गठन गर्ने निर्णय गरेको छ ।

संयुक्त जनआन्दोलनलाई व्यवस्थित एवं प्रभावकारी बनाउन उपसमितिहरू समेत गठन गर्दै लैजाने बैठकले निर्णय गरेको राणाले बताए । आन्दोलन परिचालन समिति र मातहत विभिन्न विभाग तथा समितिमा रही एकताबद्ध भई सहकार्य गर्नका लागि सम्पूर्ण राष्ट्रवादी देशभक्त नागरिक, अभियान तथा राजनैतिक दलहरूलाई बैठकले अपिल समेत गरेको उनले बताए ।
००००
नेपाल कम्युनिष्ट पार्टी एकीकृत समाजवादी उपत्यका प्रदेश कमिटीले मुलुकमा सङ्घीय लोकतान्त्रिक गणतन्त्रात्मक शासन व्यवस्थाको पक्षमा जनमत सृजना गर्ने निर्णय गरेको छ ।

आलोकनगरस्थित नेकपा एकीकृत समाजवादीको केन्द्रीय कार्यालयमा आज बसेको बैठकले प्रतिगामी शक्तिका विरुद्ध सङ्घर्षको तयारी गर्ने निर्णय गरेको केन्द्रीय प्रचार विभाग उपप्रमुख दामोदर अर्यालले जानकारी दिए । 
००००
राप्रपा नेपालका प्रवक्ता वसन्तमान सिंह अधिकारीको उपचारको क्रममा संयुक्त अधिराज्य अमेरिकामा निधन भएको छ ।
उनको लिभरमा समस्या देखिएको थियो भने पछिल्लो समय जन्डिस पनि भएको थियो ।
००००
नवलपरासी बर्दघाट सुस्ता पश्चिमको सुनवलमा सञ्चालनमा रहेको लक्ष्मी स्टिलले डेडिकेटेड तथा ट्रंक लाइनबाट विद्युत खपत गरेवापतको बक्यौता महसुल तिर्न सुरु गरेको छ ।

२३  करोड ७९ लाख  रुपैयाँ बक्यौतामध्ये लक्ष्मी स्टिलले शुक्रबार पहिलो किस्ताबापत ८४ लाख ९८ हजार रुपैयाँ बुझाएको नेपाल विद्युत प्राधिकरण, परासी वितरण केन्द्र प्रमुख सुरज रेग्मीले जानकारी दिए ।  
००००
नेकपा माओवादी केन्द्रका अध्यक्ष पुष्पकमल दाहाल प्रचण्डले नेपाली कांग्रेस र एमालेसँगको संसर्गका कारण आफूहरूमा रोग सरेको बताएका छन् । अस्पतालबाट निको नहुने रोगको उपचारका लागि जनतासँग आएको उनले बताए । 

शुक्रबार पर्साको ठोरीमा आयोजित कार्यक्रमलाई सम्बोधन गर्दै प्रचण्डले राम्रा नराम्रा कामको आत्मालोचनाका लागि आफूहरू जनताकोमा फर्केको बताएका हुन् ।
००००
पाथीभरा मन्दिर केबलकार परियोजनासम्बन्धी विवादलाई संवादको माध्यमबाट समाधान गर्न ५ मानवअधिकारवादी संस्थाहरूले अपिल जारी गरेका छन्।
जवाफदेहिता निगरानी समिति, एम्नेस्टी इन्टरनेसनल नेपाल, न्याय तथा अधिकार संस्था (जुरी–नेपाल), एड्भोकेसी फोरम नेपाल र अनौपचारिक क्षेत्र सेवा केन्द्र (इन्सेक)ले परियोजनालाई मानवअधिकारमैत्री बनाउनका लागि सरोकारवालाबीच सार्थक वार्ता आवश्यक रहेको बताएका हुन् ।
००००
नेपाली बजारमा शुक्रबार सुनचाँदीको मूल्य घटेको छ । सुन तोलामा एक हजार र चाँदी तोलामा ३५ घटेको नेपाल सुनचाँदी व्यवसायी महासंघले जनाएको छ । 

महासंघका अनुसार बिहीबार प्रतितोला एक लाख ७६ हजारमा कारोबार भएको सुन शुक्रबार प्रतितोला एक लाख ७५ हजारमा खरिदबिक्री भएको छ । 
००००
भारतको उत्तर प्रदेशका मुख्यमन्त्री एवं भाजपा नेता योगी आदित्यनाथले नेपालमा भइरहेको धर्मान्तरणप्रति गम्भीर चिन्ता व्यक्त गरेका छन् । उनले नेपाल–भारत सम्बन्ध बिथोल्ने प्रयास भइरहेकोप्रति पनि चिन्ता व्यक्त गरे । 

मधेश प्रदेशका मुख्यमन्त्री शतिसकुमार सिंहलगायत नेपालका नेताहरूसँग बिहीबार यूपीको बलरामपुर जिल्लाको माँ पाटेश्वरी मन्दिर तुलसीपुरमा भएको भेटमा योगीले नेपालमा भइरहेको तीब्र धर्मान्तरणको बारेमा चासो व्यक्त गरेका हुन् । 

फागुन २५ गते काठमाडौंमा राजतन्त्र पक्षधरले आयोजना गरेको प्रदर्शनमा आफ्नो तस्वीर राखिएकोबारे आदित्यनाथ मौन बसेका थिए । पूर्वराजा ज्ञानेन्द्र पोखराबाट काठमाडौं फर्किने क्रममा गरिएको स्वागतमा योगीको तस्वीर राखिएपछि नेकपा एमालेका नेताहरूले आलोचना गरेका थिए ।