‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
सरकारले नेपाल विद्युत् प्राधिकरणका कार्यकारी निर्देशक कुलमान घिसिङलाई बर्खास्त गरेको छ । सोमबार सिंहदरबारमा बसेको मन्त्रिपरिषद् बैठकले कुलमानलाई बर्खास्त गर्ने निर्णय गरेको एक मन्त्रीले जानकारी दिए । 

उनको ठाउँमा सरकारले हितेन्द्रदेव शाक्यलाई नियुक्त गर्ने निर्णय गरेको छ । २० दिनअघि बसेको मन्त्रिपरिषद् बैठकले कुलमानलाई कार्यसम्पादन मूल्यांकनका आधारमा पदबाट किन नहटाउने भन्दै तीन दिने स्पष्टीकरण सोधेको थियो ।
००००
मन्त्रिपरिषद् बैठकले नै सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोगका पदाधिकारी सिफारिस गर्न सर्वोच्च अदालतका पूर्वप्रधानन्यायाधीश मिश्रको अध्यक्षतामा सिफारिस समिति (सर्च कमिटी) गठन गर्ने निर्णय गरेको सरकारका प्रवक्ता पृथ्वीसुब्बा गुरुङले जानकारी दिए । यसअघि तीन दलको बैठकमा सर्च कमिटी गठन गर्ने समझदारी बनेको थियो । 
००००

सहकारी ठगी प्रकरणमा मुद्दा झेलिरहेका रास्वपाका सभापति रवि लामिछानेले विद्युत् प्राधिकरणबाट कुलमान घिसिङलाई हटाउने निर्णयको सांकेतिक विरोध गरेका छन् । 

सोमबार मध्यराति फेसबुक लाइभमा आएका उनले केही नबोलिकनै बलिएको बिजुली बत्ती एकाएक निभाए । त्यसपछि उनले मैनबत्ती सल्काएका थिए । यस्तै कांग्रेसका महामन्त्री गगन थापा, विश्वप्रकाश शर्मा, नेता शेखर कोइराला र माओवादीले कुलमान हटाउने निर्णयको विरोध गरेका छन् । 
००००
पर्याप्त आधार र तयारीविना नै विरोध प्रदर्शन घोषणा गरेका राजावादीहरू शुरूबाटै अन्योलमा देखिएका छन् । 

राजसंस्था पुनःस्थापनाका लागि सडकमा विरोध प्रदर्शन गर्दै आन्दोलन नै छेड्ने दाबी उनीहरूको छ । अस्पष्ट मुद्दा, कमजोर तयारी र शक्ति सामथ्र्यको कमजोरीले प्रदर्शन शुरू नहुँदै राजावादीहरू रक्षात्मक बन्न पुगेका छन् ।
००००
बुद्ध एयरको सफ्टवेयर ह्याक गरेर टिकट बिक्री गरेको आरोपमा प्रहरीले दुई जनालाई पक्राउ गरेको छ । 

टिकट खरिदबिक्रीको लागि बनाइएको अनलाइन कम्प्युटर प्रणाली (सफ्टवेयर)मा अनधिकृत रूपमा पहुँच र्पुयाई गैरकानूनी रूपमा विभिन्न हवाई टिकट बनाएर बेचेको उनीहरूमाथि आरोप छ ।
००००
नेकपा एमालेनिकट पत्रकारको संगठन प्रेस चौतारी नेपालको अध्यक्षमा गणेश पाण्डे सर्वसम्मत निर्वाचित भएका छन् ।
सोमबार राति सम्पन्न अधिवेशनबाट  पाण्डे सर्वसम्मत रूपमा अध्यक्षमा निर्वाचित भएका हुन् ।
००००
राष्ट्रपति रामचन्द्र पौडेल र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’बीच भेटवार्ता भएको छ ।
राष्ट्रपति पौडेललाई भेट्न प्रचण्ड सोमबार दिउँसो शीतल निवास पुगेका हुन् ।
००००
नेपाली कांग्रेस निकट लोकतान्त्रिक अपांग संघको अध्यक्षमा माधवप्रसाद चम्लागाईं विजयी भएका छन् । मतदान भएको दुई दिनपछि गरिएको मतगणनामा चम्लागाईं भारी मतान्तरले विजयी भएका हुन् ।

उनले ३५१ मत ल्याउँदा प्रतिस्पर्धी उम्मेदवार धेरै पछाडि परे । अध्यक्षका उम्मेदवार विकास थापाले ८८ र कल्पना खड्काले १३ मत मात्रै प्राप्त गरे । यता थापाको नेतृत्वमा लगत्तै समानान्तर समिती घोषणा गरिएको छ । 
००००
लगातारको गिरावटपछि नेपाल स्टक एक्सचेन्ज (नेप्से) दोहोरो अंकले बढेको छ । करिब दुई सातादेखि निरन्तर ओरालो झरिरहेको नेप्से सोमबार २६.१० अंकले बढेर २६४०.७८ को विन्दुमा बन्द भएको हो । 

लगातार ६ कारोबारका दिन दोहोरो अंकले घटेको सेयर बजारमा सोमबार दोहोरो अंकले बढेको हो ।
००००
सत्तारूढ नेकपा एमालेले पार्टीको सचिवालय बैठक र प्रधानमन्त्री केपी शर्मा ओलीलाई जोडेर आएका समाचारप्रति गम्भीर ध्यानाकर्षण भएको जनाएको छ । 

एमाले महासचिव शंकर पोखरेलले सोमबार विज्ञप्ति जारी गर्दै राजावादीहरूको केही दिन अगाडिको प्रदर्शनलाई लिएर प्रधानमन्त्री ओलीले बोलेको भनेर प्रकाशित गरिएका विषय निराधार र अतिरञ्जित भएको स्पष्ट पारेका हुन् ।
००००
धनुषाको क्षीरेश्वरनाथ नगरपालिका–८, दिगम्बरपुरका २५ वर्षीय शिवशंकर महतोको हत्यामा श्रीमतीको संलग्नता रहेको प्रहरीको प्रारम्भिक अनुसन्धानबाट खुलेको छ ।

प्रहरीले शिवशंकरकी श्रीमती सिर्जनालाई पक्राउ गरेर अनुसन्धान अघि बढाएको छ । प्रहरी उच्च स्रोतका अनुसार सिर्जनाको उनकै भिनाजु नाता पर्ने व्यक्तिसँग ‘सम्बन्ध’ थियो ।
००००
राष्ट्रपति रामचन्द्र पौडेलले संघीय लोकतान्त्रिक गणतन्त्रमा निरंकुशता र अराजकता स्वीकार्य नहुने बताएका छन् ।

सोलुखुम्बुको नेचासल्यान गाउँपालिकाको नवनिर्मित प्रशासकीय भवन उद्घाटन समारोहलाई सम्बोधन गर्दै राष्ट्रपति पौडेलले संघीय लोकतान्त्रिक गणतन्त्रमा हरेक नागरिक आफ्नो सार्वभौमसत्ताको आफैं मालिक हुने व्यवस्था भएको बताए । 

‘शासन व्यवस्थालाई सुदृढ बनाउन र यही व्यवस्थाबाट नेपाली जनताको भाग्य र भविष्य सुनिश्चित छ भन्ने महसुस गराउनुपर्ने दायित्व सरकार, राजनीतिक दललगायत हामी सबैको हो,’ उनले भने ।