एमाले महासचिव शंकर पोखरेलले प्रतिपक्षमा रहेको समाजवादी मोर्चाले शुक्रबार गणतन्त्रका पक्षमा गर्न लागेको जनप्रदर्शन प्रतिगमनको कुप्रयासका विरुद्धको सकारात्मक पहल भएको बताएका छन् । 

राजनीतिक दलहरूले आपसमा प्रतिस्पर्धा गर्ने भएपनि जनताको सार्वभौमसत्ता र लोकतान्त्रिक व्यवस्थामाथि कसैले धावा बोल्दछ भने त्यसको डटेर सामना गर्ने उनको भनाइ छ । 

‘राजनीतिक दलहरू आपसमा प्रतिस्पर्धा गर्दछन्। एक अर्काको आलोचना र विरोध पनि गर्दछन् । जनअभिमतबाट आफूलाई स्थापित गर्ने कोसिस समेत गर्दछन्’, बिहीबार राति उनले फेसबुकमा भनेका छन्, ‘ तर जनताको सार्वभौमसत्ता र लोकतान्त्रिक व्यवस्थामाथि कसैले धावा बोल्दछ भने त्यसको डटेर सामना पनि गर्न सक्दछन् । इतिहासले धेरै पटक प्रमाणित गरेको छ । त्यसमाथि अहिलेको युग जनसचेतनताले सुसम्पन्न लोकतन्त्रको युग हो ।’