कोरोना भाइरस संक्रमणका बेला बिरामी परेका प्रतिनिधिसभा सदस्य तथा राष्ट्रिय प्रजातन्त्र पार्टी (राप्रपा) वरिष्ठ नेता दीपक बोहोराको निधन भएसँगै रूपन्देही क्षेत्र नम्बर–३ को संघीय संसद्‌मा प्रतिनिधित्व रिक्त भएको छ ।

७५ वर्षीय सांसद बोहोराको उपचारका क्रममा काठमाडौंस्थित ओम अस्पतालमा मंगलबार बिहान निधन भएको भएको हो । राप्रपा रूपन्देहीका नेता अजयकुमार गुप्ताले बोहोराको शव मंगलबार गृहनगर भैरहवा ल्याएर पुनः काठमाडौं लगेर बुधबार पशुपति आर्यघाटमा दाहसंस्कार गरिने कार्यक्रम रहेको बताए ।

गत निर्वाचन (२०७९)मा एमाले-राप्रपा गठबन्धनबाट उम्मेदवार बनेका बोहोराले बहालवाला गृहमन्त्री बालकृष्ण खाँणलाई हारको स्वाद चखाएका थिए । 

चुनावी मैदानमा समेत एक शब्द नबोली निर्वाचन जितेका बोहोराले लामो समय उपचारमै बिताए । तर, स्वास्थ्यमा सुधार भएन । स्वास्थ्य जटिलताका कारण संसद्‌मा एक शब्द पनि बोल्न नपाएका बोहोरा मंगलबार अस्ताए ।

चुनावताका आवाज नसुने पनि रूपन्देहीका मतदाताले बोहोराको मन बुझेर जिताएको चर्चा भएको थियो । कोरोना महामारीको बेला घाँटीको समस्या भएका बोहोरा चुनाव जितेपछि संसद्‌को अधिकांश बैठकमा अनुपस्थित रहे । बोहोरा लगातार २७ बैठकमा अनुपस्थित रहेको सूचना मंगलबार सदनमा सभामुखले सुनाएका थिए । 

यो पनि पढ्नुहोस्- खाँण पक्राउपछि चर्चा प्रतिस्पर्धीको : नबोली चुनाव जितेका बोहोरा अझै किन छन् चुपचाप?

रूपन्देहीमा पाँच दशकदेखि राजनीति गरेका बोहोराको निधनले जिल्लाको समग्र विकासमा समेत क्षति पुगेको यस क्षेत्रका नेताहरूको प्रतिक्रिया छ । बोहोराको चुनावी अभियानमा खटिएका एमाले रूपन्देही उपाध्यक्ष हितराज पन्थीले रूपन्देहीले एउटा पाको र अनुभवी नेता गुमाउन पुगेको बताए ।

‘एमालेले आफ्नो प्रतिबद्धता पूरा गर्नेगरी गएको निर्वाचनमा बोहोरालाई जिताएको हो’, पन्थीले लोकान्तरसँग भने, ‘बोहोराको निधनले जिल्लाको विकास क्षति पनि पुगेको छ ।’ राजनीतिको क्षेत्रमा बोहोराको अभाव लामो समयसम्म खड्किरहने नेता पन्थीको भनाइ छ । 

बोहोरा रूपन्देहीमा विकासको आधारभूत जग बसाउने नेताका रूपमा चिनिन्छन् । अन्न भण्डारमा सिँचाई पुर्‍याउने भैलुभूजको शुरूआत, विमानस्थल विस्तार, खानेपानी र सडक आयोजनामा अगुवाइ, आन्तरिक बाइपासका रणनीतिक सडकहरूको विस्तारको योजना उनकै पहलमा स्थापना भएको राप्रपा नेताहरू बताउँछन् । 

बोहोराले स्वास्थ्यका कारण संसद्‌मा ‘भूमिका निभाउन नसक्दा’ रूपन्देही क्षेत्र नम्बर–३ को विकास निर्माणदेखि जनताका एजेन्डा ओझेलमा परेका थिए । 

‘सांसद आएनन्, कहाँ गए, थाहा पाइएन भनेर जनताले हामीलाई पनि बेला–बेला सुनाउने गर्थे । सांसद गुमनाम हुँदा जिल्ला सदरमुकाम र ठूलो जनघनत्व भएको क्षेत्र ‘टुहुरो’ जस्तो बन्न पुगेको थियो’, राप्रपाका एक नेता भन्छन् । 

यो पनि पढ्नुहोस्- जनप्रतिनिधिको स्वर नखुल्दा ‘टुहुरो’ बनेको एउटा निर्वाचन क्षेत्र

बोहोराले पञ्चायतकालमा खरो भाषण गरी समर्थकलाई जुरुक्कै उचाल्ने गरेको चर्चा हुन्थ्यो । पञ्चायतकालदेखि रूपन्देहीबाट सांसद र मन्त्री हुँदै आएका बोहरा २०३० देखि रूपन्देहीको राजनीतिमा जोडिएका थिए । नेता बोहोराको संसदीय यात्रा २०३६ सालदेखि शुरू भएको थियो भने रूपन्देहीबाट २०४२ सालको राष्ट्रिय पञ्चायत सदस्यका रूपमा चुनिएका थिए । 

त्यसअघि २०३८ र २०४० मा पर्यटन राज्यमन्त्री बनेका बोहरा २०५७ मा बैंक अफ काठमाडौंको अध्यक्ष बनेका थिए । बोहरा २०६७ मा वन तथा भू-संरक्षण मन्त्री बनेका थिए भने सँगै राष्ट्रिय प्रकृति संरक्षण कोषको अध्यक्षको जिम्मेवारी पनि सम्हालेका थिए । राष्ट्रिय प्रकृति संरक्षण कोष ऐन, २०३९ अनुसार कोषको संरक्षकले अध्यक्ष तोक्नसक्ने व्यवस्था रहेको छ । 

२०७० मा रूपन्देही– २ बाट संविधानसभा सदस्य निर्वाचित उनी २०७२ मा श्रम तथा रोजगारमन्त्री, २०७३ मा आपूर्तिमन्त्री र २०७४ मा स्वास्थ्यमन्त्री बनेका थिए । भैरहवा निवासी बोहरा २००७ साल चैत १८ गते पाल्पामा जन्मिएका हुन् ।