फोहोर नगरी, केही नभत्काई आन्दोलन गरेको भन्दै काठमाडौं महानगरपालिकाका मेयर बालेन (बालेन्द्र) शाहले शिक्षकहरूलाई धन्यवाद दिएका छन् ।

बुधबार नेपाल शिक्षक महासंघको आह्वानमा देशभरका शिक्षकहरू काठमाडौंमा जम्मा भएर आन्दोलन गरेका थिए । काठमाडौंका विभिन्न क्षेत्रबाट र्‍याली निकालेर माइतीघर मण्डलमा उनीहरूले धर्ना दिएका थिए ।

मेयर बालेनले आफूहरूले हामीले जरिवाना नभई चेतना खोजेको उल्लेख गरेका छन् । सार्वजनिक सम्पति पनि आफ्नै सम्पति हो भनेर त्यसलाई जोगाउने चेतनशील समाजको निर्माण गर्न खोजेको बालेनले बताएका छन् ।

‘यही शिक्षा तपाईंले आफ्नो विद्यार्थीहरूलाई पनि दिनुहोला । हामी सबै मिलेर चेतनशील समाजको निर्माण गरौँ । तपाईंहरू त झन् शिक्षक हुनुहुन्छ, तपाईंहरूको त झन् ठूलो जिम्मेवारी र भूमिका छ’, बालेनले सामाजिक सञ्जाल फेसबुकमा लेखेका छन्, ‘कृपया, आफ्नो कुरा राख्नलाई चेतनशील भएर विद्यार्थीहरूको पढाइ नबिगारी कार्यक्रम गरिदिनुहोला । गाउँ-गाउँमा सिंहदरबार भन्ने त नारा मात्र भयो । आशा छ एकदिन आफ्नो अधिकारको लागि काठमाडौं धाइरहनु नपरोस् ।’​

यस्तो छ बालेनले फेसबुकमा लेखेको टिप्पणी :
प्रिय शिक्षकहरू,
तपाईंहरूले आफ्नो आन्दोलन फोहोर नगरि, केही नभत्काई गरिदिनुभयो, धन्यवाद । हामीले जरिवाना खोजेको होइनौं, चेतना खोजेको हो । सार्वजनिक सम्पति पनि आफ्नै सम्पति हो भनेर त्यसलाई जोगाउने चेतनशील समाजको निर्माण गर्न खोजेको हो । यही शिक्षा तपाईंले आफ्नो विद्यार्थीहरूलाई पनि दिनुहोला । 
हामी सबै मिलेर चेतनशील समाजको निर्माण गरौं । तपाईंहरू त झन् शिक्षक हुनुहुन्छ, तपाईंहरूको त झन् ठूलो जिम्मेवारी र भूमिका छ यसमा ।
कृपया, आफ्नो कुरा राख्नलाई चेतनशील भएर विद्यार्थीहरूको पढाइ नबिगारी कार्यक्रम गरिदिनुहोला । गाउँ-गाउँमा सिहदरबार भन्ने त नारा मात्र भयो । आशा छ एकदिन आफ्नो अधिकारको लागि काठमाडौं धाइरहनु नपरोस् ।