नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले धार्मिक पर्यटकीय क्षेत्र त्रिवेणीको अवलोकन गरेका छन् ।

उनले बुधबार बिहान धार्मिक तथा पर्यटकीय दृष्टिले महत्त्वपूर्ण स्थल त्रिवेणीको अवलोकन भ्रमण गरेका हुन् । 

अवलोकन भ्रमणका क्रममा उनले त्रिवेणीको धार्मिक, ऐतिहासिक र पर्यटकीय सम्भावनालाई उजागर गर्न आवश्यक रहेको बताए ।

धार्मिक पर्यटन प्रवर्द्धनमार्फत यस क्षेत्रको आर्थिक विकासमा टेवा पुग्ने उनले विश्वास व्यक्त गरे ।

त्रिवेणीको गजेन्द्रमोक्ष दिव्यधामको अवलोकन भ्रमणमा पुगेका प्रचण्डलाई रुद्राक्षको माला लगाएर स्वागत गरिएको थियो । 

माओवादी केन्द्र ‘जनतासँग माओवादी हुलाकीमार्ग केन्द्रित तराई–मधेश जागरण अभियान’मा छ ।

झापाबाट शुरू भएको अभियान गत चैत ८ मा चितवन पुगेर स्थगित गरिएको थियो । नवलपुरको गैँडाकोटबाट फेरि शुरू भएको अभियानका क्रममा उनी नवलपरासीमा छन् ।

सोही क्रममा उनले त्रिवेणीको अवलोकन गरेका हुन् । अवलोकनका क्रममा उनलाई स्थानीयले त्यस क्षेत्रका समस्याबारे जानकारी गराएका थिए ।