२९ जेठ २०८३, शुक्रबार
अख्तियार दुरुपयोग अनुसन्धान आयोग, राष्ट्रिय मानव अधिकार आयोगलगायत विभिन्न संवैधानिक निकायमा नियुक्त ५२ जना पदाधिकारीविरुद्धको रिटमाथि संवैधानिक इजलासमा सुनुवाइ भइरहेको छ ।
प्रधानन्यायाधीश प्रकाशमानसिंह राउत, न्यायाधीशहरू सपना प्रधान मल्ल, मनोजकुमार शर्मा, कुमार चुँडाल र नहकुल सुवेदीको इजलासमा बुधबार सुनुवाइ भइरहेको हो ।
पछिल्लोपटक गत चैत ६ गते भएको सुनुवाइ झण्डै एक महिनापछि बुधबार निरन्तर चलिरहेको छ ।
वरिष्ठ अधिवक्ता दिनेश त्रिपाठी, अधिवक्ता ओमप्रकाश अर्याल, सम्रित खरेल, कीर्तिनाथ शर्मा पौडेललगायतले ५२ जना पदाधिकारीको नियुक्ति असंवैधानिक रहेको जिकिरसहित पदमुक्त हुनुपर्ने माग राखेर रिट दायर गरेका थिए ।
सो रिट लामो समयदेखि सर्वोच्चमा विचाराधीन अवस्थामा छ ।
२०७७ सालमा तत्कालीन प्रधानमन्त्री केपी शर्मा ओली नेतृत्वको सरकारले संसदीय सुनुवाइ छलेर नियुक्त गरेको भन्दै सोविरुद्ध सर्वोच्चमा रिट परेको थियो ।
त्यो बेला नियुक्त गरेका संवैधानिक निकायका पदाधिकारीहरू आफ्नो कार्यकालको अन्तिम चरणमा रहेको बेला सर्वोच्चमा सुनुवाइ चलिरहेको हो ।
