सरकारले राष्ट्रिय अनुसन्धान विभाग (राअवि)बाट नेपाल प्रहरीमा स्थानान्तरण भएको टोलीलाई प्रहरी अतिरिक्त महानिरीक्षक (एआईजी) बढुवामा छुटाएको छ । 

प्रहरी नायब महानिरीक्षक (डीआईजी)हरू क्रमशः  शिद्धिविक्रम शाह, सुशीलसिंह राठौर, उमा प्रसाद चतुर्वेदी, हिमालयकुमार श्रेष्ठलगायत बढुवाको प्रतिस्पर्धामा थिए । 

शुरूदेखि नै प्रहरी निरीक्षकमा भर्ना भएर डीआईजी बनेका र हाल एआईजी सिफारिसमा परेका डीआईजीहरू क्रमशः चन्द्र कुबेर खापुङ, लालमणि आचार्य, कृष्णहरी शर्मा पोखरेल, दानबहादुर कार्की, राजन अधिकारी र डा. मनोज केसीको टोलीले राअविबाट आएका टोलीलाई बढुवा सिफारिसमा रोक्न चर्को लबिङ गरेका थिए । 

डीआईजी शाहलाई एआईजीमा बढुवा गर्न सत्ता साझेदार नेपाली कांग्रेसमा चर्को दबाब थियो । तर, सिनियर टोलीलाई पन्छाएर तलकालाई बढुवा गर्दा न्यायोचित नहुने भन्दै प्रधानमन्त्री कार्यालयले अडान लिएपछि राअविबाट आएकाहरू बढुवा सूचीमा अटाएनन् । 

यो पनि पढ्नुहोस्- नेपाल प्रहरीका ६ जना डीआईजी एआईजीमा बढुवा सिफारिस

तत्कालीन प्रहरी महानिरीक्षक प्रदीप शमशेर जबराको पालामा २०५८ मा राअविका ४६ जनालाई नेपाल प्रहरीमा स्थानान्तरण गरिएको थियो । त्यसमा हाल बढुवा सूचीमा नपरेका डीआईजीहरू समेत थिए । 

तत्कालीन गृहमन्त्री रवि लामिछाने (सहकारी ठगी प्रकरणमा हाल पूर्पक्षका लागि कारागारमा रहेका)ले दुई ब्याचलाई उछिनेर बढुवा गर्दा राअविबाट आएकाहरू डीआईजी बढुवामै पछि परेका थिए । बढुवामा असन्तुष्ट एक डीआईजीले लोकान्तरसँग भने, ‘त्यतिबेला रविले अन्याय गरे, अहिले फेरि सरकारले अन्याय गर्‍यो । दुई दशक बढी संगठनमा व्यावसायिक काम गर्दा हामीलाई अर्कै ग्रहबाट आएको जसरी व्यवहार गरियो ।’

हाल बढुवा सिफारिसमा परेका ६ जना मध्येबाट शुरूमा खापुङले दुई महिना प्रहरी संगठनको नेतृत्व गर्नेछन् । त्यसपछि कार्की, अधिकारी र केसीमध्येबाट एक जनाले लामो समय (२०८४ को चुनाव भ्याउनेगरी) प्रहरीको नेतृत्व गर्न पाउनेछन् ।

आगामी भदौ ५ गते आईजीपी दीपक थापासहित उनका ब्याचीहरू एआईजी टेकबहादुर तामाङ र सुदीप गिरीले अवकाश पाउनेछन् । र, यही बीचमा हाल एआईजी सिफारिसमा परेका लालमणि आचार्यले समेत अवकाश पाउनेछन् । 

हाल बढुवामा छुटेका डीआईजीहरूले भदौ यता एआईजीमा सिफारिस पाउने सम्भावना कम देखिन्छ ।